येँ मनपाखें पार्किङया छगू हे भाः क्वःछित
येँ (नेपालभाषा टाइम्स)- यँ मनपां आः सवारी साधन पार्किङया शुल्क क्वःछिउगु दु । उपमेयर सुनिता डंगोलं निचाः घःचाःया सवारी साधनया घौछिया २५ तका व प्यचाः घःचाःयात घौछिया ७५ तका पार्किङ शुल्क क्वःछिनागु खँ कनादीगु दु ।
वय्कःया कथं निचाः घःचाः दुगु सवारी साधनं बाघौ पार्किङया १५ तका जक पूसा गाः । घौछि पार्किङया २५ तका व वयां लिपा प्रत्येक झिंन्यागू मिनेटय् ५ तका थप यायेगु व्यवस्था जूगु दु ।
प्यचाः घःचाः दुगु सवारी साधनं बाघौ पार्किङया ४० तका पूसा गाः । घौछि लिपा हरेक १५ मिनेटया १५ तका पुलेमाः । महानगर दुने पार्किङया निश्चित भाः मदुगुलिं थीथी कथंया गुनासो वःगुलिं थुकथं भाः क्वःछीमाःगु खँ नं वय्कलं कनादिल । मनपां थीथी थासय् पार्किङ चीकूगुलिं समस्या जूगु खँ धायेगु याना हःगु दु ।
उकथं हे येँ मनपां थःगु मातहतया सामुदायिक विद्यालयया शिक्षकतय्त लय् लय् तलब बीगु व्यवस्था याःगु दु । स्रोत भर्ना कोषपाखें सामुदायिक विद्यालयया शिक्षकतय्त मासिक रुपय् तलब नकेगु व्यवस्था यानागु खँ वय्कलं कनादिल ।
वय्कलं धयादिल, ‘सामु दायिक विद्यालयया शिक्षकतय्त स्वलाय् छक्वः तलब बीगु संघीय सरकारया व्यवस्था दुसां येँ मनपां धाःसा स्रोत भर्ना कोषपाखें थः मातहतया शिक्षकतय्त लय् लय् हेतलब बीगु व्यवस्था यानागु दु ।’
हनुमाध्वाखाया गुनासो
थनया हनुमानध्वाखाय् येँ महानगरपालिकां फुक्क हे कथंया सवारी साधन निषेध याःगु खँयात कयाः अन हे च्वंगु मेगु सरकारी निकाय हनुमानढोका दरवार संग्रहालय विकास समितिं मनपायात पौ छ्वःगु दु ।
समितिया कार्यकारी निर्देशक सन्दिप खनालं छ्वःगु पतिइ अन सवारी साधन निषेध याःगु सकारात्मक खःसां स्थानीयवासी, लः ट्यांकी, नसात्वँसा लगायत अत्यावश्यक सवारी साधनया लागिं धाःसा विशेष व्यवस्था यायेत इनाप यानातःगु दु ।
लिसें आः हनुमानध्वाखा लागाय् मखं व मरुसतः दुगु लागां वइगु सवारी साधन नं बन्द यायेमाःगु धासें उकिया लागिं थःपिंसं ग्वाहालि यायेगु खँ नं पतिइ धयातःगु दु ।
LEAVE YOUR COMMENTS