
येँ – येँ महानगर–पालिकायात आः कुलत मुक्त क्षेत्र घोषणा यायेगु तयारी जुयाच्वंगु खँ सीदुगु दु । येँ मनपा शहरी जनस्वास्थ्य महाशाखाया प्रमुख हरिकुमार श्रेष्ठं ‘नेपालभाषा टाइम्स’ लिसे खँ ल्हासें धुम्रपान, मद्यपान व सूर्तिया कारणं यानाः येँय् विकृति वयाच्वंगु खँ कनादिल । आः उकियात चीकेगु कथं मनपां तयारी यानाच्वंगु खँ नं वय्कलं कनादिल ।
शहरयात स्वस्थ शहर दयेकेगु निंतिं थम्हं सूर्ति, गुट्खा, चुरोट व अय्लाः मुक्त शहर दयेकेगु योजना दयेकाच्वनागु खँ कनादिसें याकनं हे थुकियात लागू यायेगु जानकारी नं बियादीगु दु । विशेष यानाः गुट्खा व सूर्ति प्याक याना हइगु प्लाष्टिकया खोलं यानाः येँय् धः जाम जुइगु व सतकय् तकं फोहोर मुनाच्वनीगु कारणं दकलय् न्हापां उकियात निं प्रतिबन्ध तयेगु खँ नं वय्कलं कनादीगु दु ।
वय्कलं धयादी, ‘कुलतया कारणं यानाः मनूतय् क्रय शक्ति म्हो जुयाच्वंगु जक मखु, थुकिं आर्थिक अवस्था नं कुहां वनाच्वंगु दु । अथे जुयाः येँ महानगरया जनतायात थुकिं मुक्त यानाः समृद्धि समाज दयेकेमाःगु दु ।’
LEAVE YOUR COMMENTS