सिडीओयात प्रदेश अन्तर्गत तयेत सुझाव

येँ (नेपालभाषा टाइम्स)- प्रमुख जिल्ला अधिकारी (सिडियो) यात प्रदेश संरचना अन्तर्गत तयेत प्रदेशया आन्तरिक तथा कानुनी मन्त्रीतय्सं उपप्रधान लिसें गृहमन्त्री नारायणकाजी श्रेष्ठयात सुझाव बिउगु दु । गृह मन्त्रालयय् प्रहरी समायोजन बारे म्हिगः ग्वसाः ग्वःगु सहलह ज्याझ्वलय् प्रदेशया मन्त्रीतय्सं उगु सुझाव बिउगु खः ।

समायोजनया नितिं माःगु निर्णय कायेत वइगु माघ १७ गते प्रधानमन्त्रीं राष्ट्रिय परिषद समन्वय समितिया बैठक सःतूगु दु । उगु बैठक न्ह्यः गृहमन्त्रीं प्रदेशया मन्त्रीतलिसे सहलह ब्याकादीगु खः । संघ, प्रदेश व स्थानीय तह (समन्वय तथा अन्तरसम्बन्ध) ऐन २०७७ या दफा २२ कथं विषयगत समितिया कमाण्ड सिस्टम मिले यायेत प्रजिअयात नं संरचनागत रुपय् प्रदेशया कानुनय् चीमाःगु सुझाव नं प्रदेशया मन्त्रीतय्सं बिउगु खः ।

प्रहरीयात समायोजन यायेधुंकाः प्रमुख जिल्ला अधिकारीं हे प्रहरी परिचालन यायेबलय् दोहोरो कमाण्ड जुइगु धासें थ्व कमाण्ड सिस्टम मिले यायेत सुझाव बिउगु खँ बागमती प्रदेशया आन्तरिक मामिला तथा कानुन मन्त्री गंगानारायण श्रेष्ठं कनादीगु दु ।

काठमाडौं उपत्यका प्रहरीयात संविधानया भावना अःखः केन्द्रीय प्रहरी मातहतय् तःगु बारे नं म्हिगः सहलह जूगु दु । सहलहया झ्वलय् बागमती प्रदेशया मन्त्रीतय्सं उपत्यका प्रहरी कार्यालययात केन्द्र मातहत तये मजिउ धकाः सुझाव बिउगु खँ नं मन्त्री श्रेष्ठं कनादीगु दु ।

समायोजन जुइपिं प्रहरी कर्मचारीया वृत्ति विकास बारे न्हूगु प्रस्तावित संघीय प्रहरी ऐनय् व्यवस्था यायेमाःगु बारे नं सहलह जूगु खः । मन्त्री श्रेष्ठया कथं ऐन कथं समायोजन जुइपिं प्रहरी कर्मचारीया बढुवाय् पंगः मवइ कथंया व्यवस्था यायेगु बारे सहलह जूगु खः । संघीय व्यवस्था क्वातुकेगु लागिं प्रहरीयात प्रदेश अन्तर्गत तयेमाःगु सः थ्वयाच्वंगु दु ।