ने. सं. ११४४ ञलाथ्व नवमी -

प्रमया जलस्येँ हानं हिले मालेफु

थप वासः याकेत प्रम ओली थौं हानं सिंगापुर वनीगु

येँ – सिंगापुरय् स्वास्थ्य परीक्षण यानाः लिहां वःगु निवाः लिपा प्रधानमन्त्री केपी ओली हाकनं वासः यायेगु निंतिं सिंगापुर वनीगु जूगु दु ।
अन यदि परीक्षण यानाः वय्कलं नयाच्वंगु वासः पाय्छि मजुल धाःसा हानं किड्नी प्रत्यारोपण याये माले फुगु खँ धाःगु दु ।

वंगु साउन १८ निसे २७ गते तक ‘स्वास्थ्य परीक्षण’ यानाः लिहां वःम्ह प्रम ओलीं आः नयाच्वंगु वासः असफल जूसा मेगु प्रत्यारोपण याइगु सम्भावना दुगु खँ धाःगु दु । उकिया निंतिं प्रम ओली ताःई तक सिंगापुरय् च्वनेमालीगु खँ धाःगु दु ।प्रधानमन्त्री ओली सिंगापुरं लिहां वयेवं थःगु स्वास्थ्य ठीक दुगु दावी यानाः ट्विट याःगु खः ।

ओलीं सिंगापुरस्थित नेसनल युनिभर्सिटी अस्ततालया चिकित्सकयाके हाकनं जाँच यायेगु निंतिं भदौ ५ गतेया ई कयातःगु दुसा ४ गते सिंगापुर थ्यंकेगु तयारी यानाच्वंगु दु ।प्रधानमन्त्री ओलीं पिने हल्ला जूथें थः सिकिस्त विरामी मजूगु दावी यानाच्वंगु दुसा वय्कःया सचिवालय व समर्थकपिंसं ओलीया स्वास्थ्ययात कयाः भ्रामक समाचार प्रकाशन याःगु धासें आलोचना यानाच्वंगु दु ।

तर उच्च सूत्रं धाःसा प्रधानमन्त्रीया स्वास्थ्यया बारे जनतायात खँ सुचुकेगु तःधंगु गल्ती जूगु धासें वय्कःया वास्तविक अवस्था छु दु उकिया बारे जनतायात जानकारी बीमाःगु व ओली हाकनं सिंगापुर छु यायेत वनेत्यंगु खः धइगु बारे सीकेगु अधिकार जनताया दुगु खँ धाःगु दु ।
वय्कः सिंगापुर वनीबलय् पार्टीया जिम्मा प्रचण्डयात बीगु खँ धाःगु दु ।

‘ठेकेदार बिसिउँ वंगु खः, सरकार मखु’
प्रधानमन्त्री केपी शर्मा ओलीं म्हिगः सदनय् सम्बोधन यासें थःगु पद मेगु चुनाव मजूतले कायम हे जुयाच्वनीगु दावी यानादीगु दु । थःगु पद गबले वनी धकाः सुनानं आशंका मयाःसां जिउ धासें वय्कलं थ्व पद मेगु चुनाव मजूतले कायम हे जुयाच्वनीगु दावी यानादीगु खः ।

मेलम्चीया ठेकेदार छम्ह बिसिउँ वंबलय् सरकार हे बिसिउँ वं थें च्वंक हल्ला यानाच्वंगु खँय् वय्कलं धयादिल, ‘बिसिउँ वंम्ह ठेकेदार जक खः, सरकार मखु । बाँकी ज्या सरकारं याइ ।’वय्कलं देशयं थुगुसी ७ प्रतिशतया विकास हासिल याःगु दु धासें थ्वहे छगू रेकर्ड जूगु नं दावी यानादिल । वय्कलं धयादिल, ‘थुगुसी ७ प्रतिशत जूगु दु, आकिवं थ्व स्वयां अप्वः जुइ ।’