आपालं कार्यकर्ता अझं तटस्थ, स्थानीय तहलय् लिच्वः मदु

येँ -संसद विघटन लिपा विभाजनया अवस्थाय् थ्यंवंगु नेपाल कम्युनिष्ट पार्टीया निगुलिं खेमां थौंकन्हय् राजधानी येँ देय् लगायत पिने जिल्लाय् समेत ततःधंगु प्रदर्शन यानाच्वंसां सर्वोच्च अदालतया फैसला व निर्वाचन आयोगया निर्णय लिपा धाःसा कार्यकर्ताया खेमा परिवर्तन अझ तच्वः जुइगु खँ धाःगु दु ।

थौंकन्हय् निगुलिं खेमां यानाच्वंगु ततःधंगु प्रदर्शन व सभाय् आपालं कार्यकर्तात सहभागी जुुइगु याःसां अझ नं गुलिखे कार्यकर्तात धाःसा निगुलिं खेमाय् मवँसे तटस्थ च्वनाच्वंगु दनि । थ्व तटस्थ च्वनाच्वंपिं कार्यकर्तात कन्हय् सर्वोच्च अदालतं सुयागु पक्षय् फैसला बी वहे पक्षय् वनीगु यक्व सम्भावना दुगु खँ धाःगु दु ।

अथे हे निर्वाचन आयोगं बीगु फैसला पियाच्वंपिं कार्यकर्तात नं आपालं दनिगु खँ सीदुगु दु । खास यानाः माधव नेपाल, झलनाथ खनाल थेंज्याःपिं नेतातय्गु खेमाय् वनाच्वंपिं आपालं कार्यकर्तात कन्हय् निर्वाचन आयोगं पार्टीया आधिकारिता व चुनाव चिं सुद्र्यः गन वनी धकाः फैसला याइ थःपिं नं उखे हे वनेगु धकाः मानसिकता दयेकाः च्वनाच्वंगु खँ सीदुगु दु ।

छुं जुयाः निर्वाचन आयोगं सुद्र्यः चिं व पार्टीया आधिकारिक मान्यता ओली पक्षयात बिल धाःसा आः माधव नेपाल पक्षय् वनाच्वंपिं आपालं कार्यकर्ता नं हानं ओली पक्षय् हे वनीगु सम्भावना दुगु खँ धाःगु दु । आः तक तटस्थ च्वनादीम्ह वरिष्ठ नेता वामदेव गौतम समेत कन्हय् सुयागु पक्षय् फैसला जुइ अन हे वनेफुगु समेत अनुमान जुयाच्वंगु दु ।

स्थानीय तहलय् लिच्वः मदु
पार्टी विभाजनया लिच्वः केन्द्र जुयाः प्रदेश सरकार तक थ्यंकः वंसां स्थानीय सरकारय् धाःसा थुकिया लिच्वः खास हे लाःगु खने मदुनि । निगुलिं पुचःया स्थानीय नेतातय्सं धाः कथं पार्टी विभाजनया लिच्वः आः तक निगुलिं पुचःपाखें ग्वसाः ग्वयाच्वंगु सभा व ¥यालीइ जक केन्द्रित जुयाच्वंगु दु । स्थानीय सरकारया ज्याखँय् हे लिच्वः लाइ कथं आः तक छुं समस्या पिहां वःगु मदुनि ।

येँ महानगरपालिकाय् नं ३२ म्ह वडा अध्यक्षपिं मध्ये आः तक न्याम्ह वडाध्यक्षपिं नेपाल–दाहाल खेमाय् वंगु खनेदु । उकी वडा नं. ५ या शुद्धकुमार डंगोल, १४ या शोभा सापकोटा, १५ या इश्वरमान डंगोल, २३ या मचाराजा महर्जन नं दुथ्याः । येँ मनपाया मेयर विद्यासुन्दर शाक्य धाःसा केपी ओली खेमाय् दी । तर खेमा विभाजन जूसां मनपाया ज्याखँय् धाःसा छुं लिच्वः मलाःगु खँ धाःगु दु ।

सम्बन्धित बुखँ

LEAVE YOUR COMMENTS