बाराहीयात ११ लाखया सिरपाः

येँ -नेपाःया अतिकं नांजाःगु बुंगद्यः जात्राय् बुंगद्यःया रथ दयेकेगु ज्या यानादीम्ह भाजु दिल कुमार बाराहीयात कोरियाया झेन्जु शहरं बीगु ‘झेन्जु अन्तर्राष्ट्रिय सिरपाः’ म्हिगः लःल्हात ।

थुगुसी कोभिड–१९ या प्रकोपं यानाः म्हिगः अनलाइन ज्याझ्वःपाखें वय्कःयात थ्व सिरपाः लःल्हाःगु खः । थ्व सिरपाः १० हजार डलर धनराशी (आःया डलर भाः कथं ११ लाख नेरु स्वयां अप्वः) खः । लिसें थुकी कोरियन कलाकारं तयार यानातःगु छपाः कलाकृति नं देछाइ ।

भाजु बाराहीं नेपाःया नांजाःगु बुंगद्यःया रथ दयेकेगु ज्याय् सिँयागु सकतां ज्या यानादी । वय्कलं थ्व ज्या याना वया च्वनादीगु करिब ५० दँ दये–धुंकूगु दु । वय्कःया थ्वहे योगदानया कदर यासें थुगुुसी वय्कःयात थ्व सिरपाः लःल्हायेगु निर्णय जूगु खः ।

कोरियाया झेन्जु नगरपाखें विश्वन्यंकं अमूर्त संस्कृति व कलाया संरक्षण एवं संवद्र्धनया ख्यलय् ज्या याना वयाच्वंपिं मनूतय्त दँय्दसं थ्व सिरपाः बीगु याना वयाच्वंगु दु ।

थुगुसी थ्व सिरपाः नेपाःपाखें भाजु बाराही लगायत ताजिकिस्तानया डा. सिरिन्बेक दाभ्लाटमामाडोभ व इटलीया एल फेल्जयात नं मंकाः कथं थ्व सिरपाः लःल्हाःगु खः ।

थुगुसी नेपाःया लागिं भाजु बाराहीयात थ्व सिरपाः बीकेत मू रुपं नेपाःया हे डा. मोनालिसा महर्जनं विशेष पहल यानादीगु खः । नेपाःया सम्पदा विषयय् हे विद्यावारिधी यानादीम्ह डा. महर्जनं थ्व सिरपाःया लागिं आवश्यक भ्वं व थीथी सामग्री मुंकाः कोरियाया सम्बन्धित संस्थाय् बुझे यानादीगु खः । थ्व सिरपाः लाःगु कारणं नेपालय् संस्कृति व सम्पदाया ख्यलय् ज्या याइपिंत हःपाः दइगुया नापनापं नेपाःया संस्कृति विश्वय् प्रचार जुइगु बिचाः नं डा. महर्जनं प्वंकादीगु दु ।