येँया भित्री शहरय् डेंगूया महामारी

येँ (नेपालभाषा टाइम्स)- येँया भित्री शहरी लागाय् डेंगू महामारी थें जुइक न्यना वंगु दु । थौंकन्हय् येँया अस्पतालय् डेंगूया ल्वगित यक्व वयाच्वंगु दुसा छेँय् हे च्वनाः वासः याकाच्वंपिं नं उलिं हे अप्वयाच्वंगु दु ।

थ्व झ्वलय् थनया १७ वडाय् च्वंगु छत्रपाटी निःशुल्क चिकित्सालयय् डेंगूया विरामी अप्वयाः टेन्टय् समेत तयाः वासः यायेमाःगु अवस्था वःगु दु । अस्पतालया ९० प्रतिशत धइथें बेडय् डेंगूया विरामी भर्ना यानातःगु जुयाः आः उलिं नं मगाःगुलिं पिने टेन्ट तयाः बेड थपे यानातःगु दु । थपे जूगु बेड नं डेंगूया विरामीं जायेधुंकूगु दु ।

अस्पतालया अध्यक्ष डा. मनोज श्रेष्ठं विरामीया चाप तसकं अप्वयाः टेन्टय् तयाः वासः यायेमाःगु खँ कनादिल । ‘छत्रपाटी चिकित्सालयय् हे थुलिमछि विरामी वःगुया अर्थ येँ देय्या भित्री लागाय् हे महामारी थें जुइधुंकूगुया संकेत खः’ डा. श्रेष्ठं ‘नेपालभाषा टाइम्स’ यात कनादिल । वासः याकः वःगुलिं अझ यक्व विरामीयात छेँय् हे च्वनाः वासः याकेगु सल्लाह बियाः लित नं छ्वयाच्वंगु दु ।

डेंगू तसकं न्यना वंगुलिं सकलें सतर्क जुइमाःगु खँ नं वय्कलं कनादीगु दु । ज्वरो वइबलय् सामान्य ल्वय् थें जक च्वंसां यदि बांलाक उपचार मजुल धाःसा थ्व ल्वय् प्राणघातक समेत जुइफु ।

डेंगू विशेष यानाः पत्तिपाखें सरे जुइगु ल्वय् जूगु कारणं छेँय् जिक्व सरसफाई यायेमाःगु व पत्तिया ख्येँ च्वने फइ कथं गनं नं फोहोर लः मुंके मजिउगु खँ नं डा. श्रेष्ठं कनादिल । भित्री शहरय् हे ल्वय् न्यना वनेधुंकूगुलिं थ्व अझ न्यनीगु खतरा दु ।