रानीपुखूली लः जायेके जिल

येँ – रानीपुखूया सतहय् हाकुचा व अप्पा लायेगु ज्या लिसें लः जायेगु ब्वय् पःखाः दनेगु ज्या क्वचाःगु खँ राष्ट्रिय पुनर्निर्माण प्राधिकरणं धाःगु दु । न्यादँ न्ह्यव भुखाचं स्यंगु रानीपुखू पुनःनिर्माणया झ्वलय् उपभोक्ता समितिमार्फत पुखूया सतह व लः जायेगु ब्वये पःखाः ग्वयेगु ज्या जूगु खः ।

उपभोक्ता समितिया अध्यक्ष अजयरत्न स्थापितं प्राधिकरणयात थौं सोमवाः थःपिंत जिम्मेवारी बियातःगु ज्या क्वचाःगु औपचारिक जानकारी बीगु खँ धयादीगु दु । वि.सं. २०७५ फागुनय् गठन याःगु उपभोक्ता समितिं पुखू व सतहया जःखःया १५ निसें १८ इञ्च हाकुचा तयाः अन अप्पा लायेगु ज्या याःगु खः ।

वंगु वैशाख १२ गते भुखाय् ब्वःगु न्यादँ थ्यंगु न्हि न्ह्यव हे ज्या क्वचायेकेगु क्वःछिनातःगु खःसां कोरोना संक्रमणया खतराया कारणं सरकारं तःगु लकडाउनया कारणं ज्या प्रभावित जूगु खः । पुखूया सतह व लः जायेकेथाय् पःखाः ग्वयेगु ज्या क्वचायेवं आः वा वइगु लः जायेकफइगु जूगु दु ।

प्राधिकरणया प्रमुख कार्यकारी अधिकृत सुशील ज्ञवालीं वा वःगु लः, त्रिचन्द्र कलेज व दरवार हाइस्कूल क्षेत्रया वाति लः मुंकाः पुखुली यंकेगु ज्यायात प्राथमिकता बीगु तयारी जुयाच्वंगु खँ धयादीगु दु । लः मगात धाःसा भूमिगत स्रोतपाखें जायेकेगु व्यवस्था यायेगु खँ नं वय्कलं धयादीगु दु ।

सम्बन्धित बुखँ

LEAVE YOUR COMMENTS