ने. सं. ११४४ कौलाथ्व पारू - नःलास्वनेगु

फोहोर वायेथाय् गोलीं कयेकल

येँ (नेपालभाषा टाइम्स)- बञ्चरेडाँडाय् फोहोर वायेत स्थानीय जनतां हानं पंगः थंगु दुसा पंगः चीकेगु लागिं प्रहरीं गोलीं समेत कयेकेमाःगु अवस्था पिहां वःगु दु ।
प्रहरीया गोलीं कयाः छम्ह स्थानीय मनू घाःपाः जूगु खँ धाःगु दु । प्रहरीं फोहोर वाके बीगु लागिं रबरया गोलीं कयेकूगु खःसा उकिं लानाः स्थानीय कमल तामाङ घाःपाः जूगु खः । तामाङयात मिखाया लिक्कसं रबरया गोली लाःगु खँ धाःगु दु ।

फोहोर वायेगु खँय् सहमति जूगु छन्हु लिपा हे स्थानीय वासिन्दां पंगः थंगु खःसा उकियात चीकेत प्रहरी प्रशासनं कुतः याःगु खः । तर स्थानीय वासिन्दां फोहोर वायेत वंगु गाडीयात पनाः अप्पां कयेका हयेवं प्रहरीं शुरुइ हवाई फायर याःगु खः ।

लिपा प्रहरीं स्थिति नियन्त्रणय् कायेगु नितिं न्यागू राउण्ड हवाई फायर नं याःगु खँ येँ जिल्ला प्रहरी परिसरया एसपी दिनेशराज मैनालीं कनादीगु दु । बञ्चरेडाँडाया कःनि ब्व व वा ब्वय् च्वनाच्वंपिं आन्दोलनकारीतय्त लिनाछ्वयेगु झ्वलय् डाँडाय् च्वनाच्वंपिं स्थानीय वासिन्दां अप्पां कयेकेगु शुरु याःगु खः ।

येँ महानगरपालिकाया प्रवक्ता नविन मानन्धरया कथं म्हिगः सुथय् तिनपिप्ले तक गाडी वनाच्वंगु खःसा वयां च्वय् गाडी यंकेत सुरक्षा माः धकाः खँ वयेवं १ बजेपाखे सुरक्षाकर्मी उखे वंगु खः । तर सुरक्षाकर्मीतय्सं फोहोर वायेगु वातावरण दयेकेगु कुतः यानाच्वंगु इलय् स्थानीय वासिन्दा आक्रोशित जुयाः अप्पां कयेकेगु शुरु यायेवं प्रहरीं हवाई फायर याःगु खः ।

प्रवक्ता मानन्धरया कथं बञ्चरे–डाँडाय् फोहोर वायेगु वातावरण स्यनाच्वंगु दुसा मेखे फोहोर वायेगु वातावरण दयेकेत जुयाच्वंगु कुतः ताः मलाःगु खँ ‘नेपालभाषा टाइम्स’ यात कनादीगु दु । फोहोर वायेगु वातावरण दयेकेत छुं कुतः जुयाच्वंगु दु ला धइगु न्ह्यसःया लिसलय् वय्कलं धयादिल, ‘आः तक फोहोर वायेगु वातावरण दयेकेगु लँपु चाःगु मदुनि, तर कुतः धाःसा जुयाच्वंगु दु ।’

फोहोर वायेगु वातावरण दयेकेगु कुतः जुयाच्वंसां नं स्थानीय वासिन्दा व थीथी राजनीतिक पार्टीया कार्यकर्तापाखें थीथी कथंया माग वयाच्वंगुलिं फोहोर वायेगु वातावरण स्यना वनाच्वंगु दु । स्थानीय वासिन्दाया माग व राजनीतिक पार्टीया माग थवंथवय् ज्वःमलाःगु कारणं यानाः नं फोहोर वायेगु वातावरण दयेकेगु स्वयां नं वाके मबीगु वातावरण अप्वया वनाच्वंगु दु ।

फोहोर वायेत प्रहरी प्रशासनया कुतः व वाके मबीगु स्थानीय वासिन्दाया दथुइ म्हिगः सन्ध्या इलय् तक ल्वापु जुयाच्वंगु खः । म्हिगः प्रहरीं अन टियर ग्यासया लिसें रबरया गोली तकं छ्यःगु खः । अन गुलि टियर ग्यास व गोली छ्यल धइगु बारे प्रहरीं छुं धाःगु मदुनि । तर गोलीं कयेकाः मनू घाःपाः याना बिउगुलिं स्थिति झन् स्यनेफु धाःगु दु ।