पत्रकारतय् आन्दोलन आःयात स्थगित

येँ – सरकारं हःगु मिडिया विधेयकयात कयाः नेपाल पत्रकार महासंघं घोषणा याःगु स्वंगूगु चरणया आन्दोलन आःयात स्थगित याःगु दु ।

म्हिगः नेकपा संसदीय दलया ज्याकुथी दलया उपनेता सुवास नेम्वाङ, महासचिव बिष्णु पौडेल, राष्ट्रिय सभाया नेता दिनानाथ शर्मा, कानुनमन्त्री भानुभक्त ढकाल, सांसद योगेश भट्टराईपिनि उपस्थितिइ खिमलाल भट्टराईं संसदय् दर्ता जुयाच्वंगु मिडिया काउन्सिल विधेयक संशोधन प्रस्ताव तयार यानाः महासंघं ल्ह्वना वयाच्वंगु मिडिया काउन्सिलया स्वायत्तता, गठन प्रक्रिया, दण्ड जरिवाना लगायतया विषययात सम्बोधन यायेगु व सञ्चार सम्बन्धी मेगु विधेयकय् नं महासंघ लिसे सहलह यानाः जक न्ह्याःवनेगु धकाः लिखित प्रतिवद्धता प्वंकूगुलिं महासंघया स्वंगूगु चरणया आन्दोलन स्थगित यानागु खँ महासचिव बिष्टं जारी याःगु प्रेस विज्ञप्तिइ धयातःगु दु ।

प्रेस विज्ञप्तिइ सरकारं दर्ता याःगु विधेयकया सन्दर्भय् सरकारया नेतृत्व यानाच्वंगु पार्टीया संसदीय दलपाखें प्रतिवद्धता प्वंकूगुलिं महासंघं उकियात लसकुस याना धासें आन्दोलनय् तिबः बिउपिं व ऐक्यवद्धता प्वंकूपिं आम पत्रकार, सम्पादक, अधिकारकर्मी, प्रेस स्वतन्त्रताया पक्षधर सकलें प्रति आभार नं प्वंकातःगु दु ।