३ नम्बरया राजधानी काभ्रेय् तयेगु तयारी

येँ (नेपालभाषा टाइम्स) – देय्या हे राजधानी समेत दुगु ३ नम्बर प्रदेशया राजधानी काभ्रेपाखे हे जुइगु सम्भावना प्रवल जुया वःगु दु । सरकारं आः थथें राजधानी तोके याइगु सम्भावना कम जक दुसां ३ नम्बर प्रदेशया राजधानी काभ्रेय् यंकेगु तयारी धाःसा दुनें दुनें गाक्कं क्वातुया वःगु खँ सूत्रं धाःगु दु ।
राजधानी तोके यायेगु अधिकार प्रदेशसभायात हे बियातःगु दु । ३ नम्बर प्रदेशय् त्याना वःपिं अधिकांश सांसदतय्सं ३ नम्बर प्रदेशया राजधानी काभे्रय् तयेगु हे पाय्छि जुइ धकाः मत व्यक्त याना हयाच्वंगु दु । उकी अप्वः यानाः एमालेया सांसदत हे दुथ्याःगु खँ नं धाःगु दु । थ्व प्रदेशया राजधानी ख्वपय् तयेगु कुतः नं जुयाच्वंगु खःसां ख्वपयात सांस्कृतिक नगर हे दयेकेमाः धइगु सः प्रवल जुया वःगुलिं ख्वपया सम्भावना कम जुया वंगु खँ सूत्रं धाःगु दु । आपालं संस्कृति व सम्पदाप्रेमितय्सं समेत ख्वपय् राजधानी तयेगु पाय्छि जुइ मखु धयाहःगुलिं काभ्रेया सम्भावना अप्वया वंगु सूत्रया दावी दु ।
उखे ५ नम्बर प्रदेशया राजधानी दाङय् जुइगु सम्भावना धाःसा कम जुया वंगु खँ सूत्रं धाःगु दु । बुटवलं राजधानीया लागिं बल याना हयेवं दाङया शक्ति कमजोर जुया वंगु खः । राजधानी जुइगु सम्भावना कम जुइवं दाङय् उकुन्हु थहां वनेधुंकूगु जग्गाया भाः नं हानं कुहां वंगु खँ सीदुगु दु । सूत्रतय्सं धाः कथं दाङय् राजधानी तये हयेगु आन्दोलनय् अप्वः यानाः स्थानीय जग्गा दलालत समेत सक्रिय जुयाच्वंगु खँ नं पिहां वःगु दु । राजधानी वइगु चर्चा तच्वया वनेवं दाङया थीथी लागाय् आकाझाकां जग्गाया भाः स्वदुगं थहां वंगु खः । थ्वहे इलय् जग्गाया ध्यबा बैना बीगु ज्या समेत तीव्र रुपं जूगु खः ।