युवक बौद्ध मण्डलया ५२ क्वःगु साधारण सभा
यल (नेपालभाषा टाइम्स)÷ युवक बौद्ध मण्डल, नेपालया ५२ क्वःगु वार्षिक साधारण सभा नकतिनि क्वचाल । साधारणसभा संस्थांया २७ गूगु ज्यासना पुचःया नं ल्यज्या याःगु खः ।
निगू चरणय् न्ह्याःगु साधारण सभाया न्हापांगु सत्रया ज्याझ्वः अध्यक्ष अरणीतारा वज्राचार्यया सभापतित्वय् जूगु खः । पूज्यपाद संघनायक महासद्धम्म जोतिक धज श्रद्धेय भिक्षु बोधिसेन महास्थविर मूपाहांकथं बिज्याःगु खःसा विशेषपाहांकथं डब्लुबीएफ व धर्मोदय सभाया उपाध्यक्ष पद्मज्योति झायादीगु खः ।
मूपाहां संघनायक भिक्षु बोधिसेन महास्थविरं युवक बौद्ध मण्डलया न्हूगु भवनया उलेज्यालिसें धर्मदेशना बियाबिज्याःगु खः । नापं संस्थापाखें बिया वयाच्वंगु छात्रवृत्ति नं लःल्हाःगु खः । थुगुसी ३७ म्ह विद्यार्थीपिंत दातापिं थः हे उपस्थित जुयाः छात्रवृत्ति लःल्हाःगु खः । ज्याझ्वलय् विशेष पाहां पद्मज्योति, संस्थाया पुलांम्ह नायः चन्द्रमान शाक्य, छ्याञ्जे विद्या शाक्यं नुगःखँ तयादीगु खःसा न्वकु आशारत्न शाक्यं सुभाय् देछानादीगु खः ।
निगूगु चरणय् संस्थाया २७ गूगु ज्यासना पुचःया ल्यज्या जूगु खः । न्हूगु ज्यासना पुचलय् राजन शाक्य अध्यक्ष, तेज वज्राचार्य न्हापांम्ह उपाध्यष, सुरेश वज्राचार्य निम्हम्ह उपाध्यक्ष, नन्दरत्न शाक्य (सानुभाई) महासचिव, उत्तम वज्राचार्य कोषाध्यक्ष, विद्या शाक्य सचिव, प्रदीप वज्राचार्य सह कोषाध्यक्ष, तीर्थरत्न वज्राचार्य सह सचिव व सन्नी शाक्ययात प्रचार सचिव ल्यःगु दु । थुकथं हे दुजलय् राजेश शाक्य, आशारत्न शाक्य, सनम शाक्य, हेमरत्न वज्राचार्य, महेशमान शाक्य, भाइराजा शाक्य, मित्रुराज शाक्य व प्रकाश शाक्य निर्वाचित जुयादीगु दु ।
LEAVE YOUR COMMENTS