ने. सं. ११४३ तछलाथ्व द्वादशी -

येँय् मिस नेवाः पोखराया प्रतियोगिपिं

येँ – मिस नेवाः पोखरा–११४० य् ब्वति कयाच्वंपिं प्रतियोगीपिं येँय् थ्यंकः वःगु दु । कासाय् ब्वति कयाच्वंपिं नीन्याम्ह प्रतियोगी अध्ययन भ्रमणया सिलसिलाय् येँय् वःगु खः । नेवाः तजिलजिलिसें थनया भाषा, कला, संस्कृति, संस्कार, रहनसहनया बारे जानकारी कायेगु ल्याखं कासाय् ब्वति कयाच्वंपिं प्रतियोगीपिं येँय् वःगु खः ।

येँय् वःगु उगु पुचःयात चःमति नेवाः खलः, किपू नगरपालिकां लसकुस यासें स्थानीय जात्रा, पर्व, संस्कृतिया बारे नं जानकारी बिउगु खः ।
मिस नेवाः पोखराया ग्वसाः खलः नेवाः खलः कास्कीया मूछ्याञ्जे सुविन्द्र श्रेष्ठ, ज्याझ्वःया कजि विमल श्रेष्ठया नेतृत्वय् वःगु उगु पुचः येँय् वःगु खः ।

कासाय् ब्वति कयाच्वंपिं प्रतियोगीपिंत वंगु माघ १७ गतेनिसें नेवाः भाय्, कला, संस्कृति, संगीत, सांस्कृतिक, संस्कार, नेवाः सभ्यता आदिया बारे प्रशिक्षण बिया वयाच्वंगु दु । १६ दँनिसें २२ दँ तकया नेवाः मिसातय्सं ब्वति कयाच्वंगु मिस नेवाः पोखराया फाइनल कासा थ्व हे वइगु चैत ८ गते पोखरा सभागृहय् मिस नेवाः पोखराया फाइनल कासा जुइ ।

कासा न्हाप, लिउ, लियांलिउयात छसिकथं पीद्वः, नीन्याद्वः व झिंन्याद्वः दांलिसें थीथी विधा उत्कृष्ट नेपालभाषा, मिस ट्यालेन्ट, फोटोजेनिक, वेस्ट पर्सनालिटी, बेस्ट स्माइल, भ्युअर्स च्वाइस आदि विधाय् अवार्ड त्याकूपिंत नं दां व दसिपौलिसें थीथी सिरपाःया व्यवस्था दुगु ग्वसाः खलकं जानकारी बिउगु दु ।