नेपालभाषा संकिपा ‘घोषक’या प्रिमियर

ये- चिराग फिल्मस प्रोडक्सनया न्ह्यब्वया बुद्धकालीन बाखंया लिधंसाय् निर्माण जूगु नेपालभाषा संकिपा ‘घोषक’या न्हापांगु शो क्यनेज्या जुल । थनया ल्हुतिइ च्वंगु अष्टनारायण पिक्चर्सय् वंगु शनिवाः संकिपाया न्हापांगु शो क्यनेज्या जूगु खः ।

संकिपाया क्यने स्वयां न्ह्यः जूगु बःचाधंगु ज्याझ्वलय् मूपाहांकथं झायादीम्ह येँ महानगरपालिकाया प्रमुख विद्यासुन्दर शाक्यं संकिपा निर्माण यायेगु जक मखु, उकिया लगानी नं सायेके फइकथं संकिपा निर्माण यायेगु स्वयेमाः धयादिल । नेपालभाषाया संकिपाया बजाः सीमित जूगु व उकियात व्यापक याना यंकेत मेमेगु भासं नं सब टाइटल तयाः वा डबिङ याना यंकेमाः धासें उकिया निंतिं महानगरपालिकापाखें फूचाःगु ग्वाहालि यायेत तयार दु धयादिल ।

ज्याझ्वःया विशेष पाहां महानगर उपप्रमुख हरिप्रभा खड्गी श्रेष्ठं ऐतिहासिक, धार्मिक, पौराणितक बाखंया लिधंसाय् संकिपा निर्माण यायेगु जक मखु, उकिया वास्तविकता, अन्तर्वस्तुयात कयाः दुग्यंक खँ थुइकाः अध्ययन, अनुसन्धान, खोज यायेमाः धयादिल ।

पाहांकथं बिज्याम्ह विश्वशान्ति विहारया भिक्षु निग्रोध महास्थविरं थुकथंया संकिपापाखें भगवान बुद्धया शिक्षा व वसपोलया ज्ञानयात प्रचार प्रसार यायेत तिबः व ग्वाहालि जू वनीगु विश्वा प्वंकाबिज्यासे संकिपायात सफलता चूलायेमा धकाः कामना यानाबिज्यात ।

संकिपाया निर्माता रोशन वज्राचार्यया सभापतित्वय् मेम्ह निर्माता प्रेमा शाक्यं लसकुस यानादीगु जूगु ज्याझ्वलय् पाहांकथं झायादीम्ह येँ महानगरपालिका १८ वडाअध्यक्ष न्हुछेकाजी महर्जन, संकिपाया निर्देशक अमृतचन्द्र श्रेष्ठ, पटकथा च्वमि दर्शनवीर शाक्यं नं संकिपा निर्माणया थीथी पक्षयात कयाः नुगःखँ तयादीगु खः ।
ज्याझ्वलय् मूपाहां महानगर प्रमुख शाक्यं संकिपाया निर्माता, निर्देशक, प्राविधिक, म्येँ, संगीत ख्यलय् ग्वाहालि यानादीपिंत व पाहां भिक्षु निग्रोध व वडाअध्यक्ष महर्जनं कलाकारपिंत खादां क्वखायेकादीगु खः ।

करिब प्यदँ न्ह्यः निर्माण शुरु जूगु व निदँ न्ह्यः हे क्यनेगु ग्वसाः दुगु खःसां कोरोना कारणं आः वयाः प्रिमियर याःगु संकिपाय् राजेन्द्रमान शाक्य, पे्रमा शाक्य, पल्पसा डंगोल, अन्नपूर्णेश्वरी श्रेष्ठ, किशोर चिपालु, राजु महर्जन, अञ्जली शाक्य, राजराम भाम, उदेन न्हूसाय्मि, भिमसेन रिसाल, सरस्वति मानन्धर, श्यामसुन्दर शिल्पकार, अर्णेश्वरी शिल्पकार, धिरेन शाक्य लगायतया कलाकारतय् भूमिका दु ।
रवि साय्मिं छाँयाकन यानादीगु संकिपाया सम्पदान सुनिलकृष्ण ताम्राकारं यानादीगु खः । संकिपाया बाखं च्वमि बौद्ध विद्वान धर्मरत्न शाक्य ‘ऋषि’या लुमन्तिइ छगू मिनेट मौनधारण नं याःगु खः ।