नीलः समाजया ज्येष्ठ नागरिक अभिमुखीकरण ज्याझ्वः

येँ – नीलः समाज सेवा संघया ग्वसालय् ज्येष्ठ नागरिक अभिमुखीकरण ज्याझ्वः जुल । थनया न्ह्यःखाय् च्वंगु जन चिकित्सालयया सभाहलय् ज्येष्ठ नागरिक सेवा अभिमुखीकरण नामं जूगु ज्याझ्वलय् ज्याथजिथिपिंत जुइगु ल्वय् व ल्वचं कयाः जुइगु समस्याया बारे परामर्श बीगु ज्या जूगु खः ।

संघया नायः माधवरत्न ताम्राकारं ज्याझ्वःया उद्देश्य बारे कनादीगु ज्याझ्वलय् काठमाडौं मोडेल हस्पिटल नर्सिङ कलेजया प्रिन्सिपल मय्जु सानु तुलाधरं ज्याथजिथि जुल कि जुइगु ल्वय्, जिद्दीपन, ल्वःमना वनीगु थेंज्याःगु समस्या जुइगु बारे जानकारी बियादीगु खः । लिसें वय्कलं ज्याथजिथिपिंत अनेक समस्या वइगु इलय् छेँय् च्वंपिं सकल छेँजःपिंसं विशेष हनाबना तयाः बांलाक सुसाःकुसाः यायेगु स्वयेमाः धयादिल ।

मानव विकास संगठन नेपालया विशेष प्रस्तुतीकथं जूगु ज्याझ्वलय् संगठनया नायः लक्ष्मी राई लगायत दुजःपिं नापं वरिष्ठ नर्सपिं रमा घिमिरे, तक्मा केसी, भगवती कालिकोटेपिंसं ज्याथजिथिपिंत गुकथं सुसाःकुसाः यायेगु धइगु बारे अनुभव न्यंकादीगु खः ।
ज्याझ्वलय् सहभागि जुयादीपिंसं थःथःगु छेँय् जुयाच्वंगु समस्यायात कयाः कनादीगु ज्याझ्वःयात नीलः बचत तथा ऋण सहकारी संस्थां विशेष ग्वाहालि याःगु खः ।