लानि पुखुलिइ छठ न्यायेके मबिल

येँ (नेपालभाषा टाइम्स)- येँया लानि पुखुलिइ येँ मनपां छठ पुजा न्यायेके मबिउगु खँय् छठ माने याइपिं मधेशी समुदायं असन्तुष्टि प्वंकूगु दु । येँ महानगरपालिकां धाःसा लानि पुखुलिइ छठ पर्व न्यायेकेगु नामय् व्यापारिक प्रयोजन नं दुथ्याःगुलिं अन छठ पर्व न्यायेके मबियागु खँ धाःगु दु ।

मनपाया मेयर बालेन साहया स्वकीय सचिव भुपदेव साहं व्यापारिक प्रायोजक सहित निवेदन वःगुलिं अनुमति मबियागु खँ धयादीगु खः ।

वय्कलं लानि पुखुलिइ छठ पर्व न्यायेकेत स्थानीयस्तरं प्रस्ताव मवःगु व न्हापा नं अन छठ पर्व न्यायेकेगु ज्या मजू धासें धयादिल, ‘लानि पुखू किजा पुजा कुन्हु छन्हु जक चालीगु खः । मेबलय् चाली मखु ।’

वय्कलं लानि पुखुलिइ छठ पर्व न्यायेकेत इनाप यासें महानगरय् वःगु ग्वसाः खलःया पत्रय् व्यापारिक प्रयोजनया खँ समेत दुगुलिं उकियात थःपिसं अस्वीकार यानागु धासें धयादिल, ‘थन वःगु प्रस्तावय् पूवंक लिस्ट नं दु । उकी विज्ञापनया ध्यबा थुलि, ज्या यानागु ध्यबा थुलि धकाः च्वयातःगुलिं यानाः हे अन छठ पर्व न्यायेक मबियागु खः ।’

वय्कलं प्रस्ताव स्थानीय वडा कार्यालयपाखें वयेमाःगु खःसां वडालिसे समन्वय मयासे वःगुलिं वडाय् समन्वय यायेत छ्वयागु तर वडाय् अज्याःगु प्रस्ताव मवःगुलिं नं लानि पुखुलिइ छठ न्यायेके मबियागु खँ कनादीगु दु । वय्कलं वडाया नेतृत्वय् येँया कमलपोखरी व गौरीघाटय् छठ न्यायेकेत अनुमति बियागु धासें सार्वजनिक सम्पत्ति न्ह्यःने तयाः थीथी शीर्षकय् आर्थिक लाभ कायेगु आज्जु खनेवं अनुमति मबियागु खँ नं स्पष्ट यानादिल ।