ज्येष्ठ नागरिकयात मोहनि भत्ता

यल(नेपालभाषा टाइम्स)- यल महानगरपालिकां नगरया ज्येष्ठ नागरिकयात मोहनिया भत्ता बीगु जूगु दु । यल महानगरं नगरय् बसोबास याना वयाच्वंपिं ७० दँ पुलेधुंकूगु ज्येष्ठ नागरिकयात मोहनि भत्ता वापत म्हति झिद्वः तका बीत्यंगु खः ।

यल महानगर प्रमुख चिरिबाबु महर्जनं थ्वयां न्ह्यः मोहनिया इलय् अतिरिक्त सुविधा अन्तर्गत न्याद्वः तका बिया वयाच्वंगु खःसा थुगुसी उकी न्याद्वः थप यानाः झिद्वः ताका बीगु खँ कनादीगु दु । नेपाःमितय् तःजिगु नखः ज्येष्ठ नागरिकं नं उलि हे हर्षोल्लासपूर्वक हने खनेमा धइगु ल्याखं यल महानगरं थुकथंया पलाः न्ह्याकागु वय्कलं कनादिल ।

महानगरं बोर्ड बैठकं निर्णय यानाः ज्येष्ठ नागरिकया निंतिं उकथंया सुविधा बीत्यंगु खः । बोर्डया निर्णयकथं ज्येष्ठ नागरिकयात बीगु आवश्यक बजेट तकं व्यवस्था जुइधुंकूगु यल महानगर प्रमुख महर्जनं कनादिल । यल महानगर दुने जक थ्यंमथ्यं न्हय्द्वः ज्येष्ठ नागरिक दुगु महानगरपालिकां जानकारी बिउगु दु ।

थ्व हे झ्वलय् यल महानगरं ‘ज्येष्ठ नागरिकलिसे महानगरपालिका’ ज्याझ्वः न्ह्याकेत्यंगु दु । कार्यविधि हे दयेकाः न्ह्याकेत्यंगु उगु ज्याझ्वः अन्तर्गत सुं नं ज्येष्ठ नागरिक म्हं मफुत धाःसा इमिगु सेवा, रेखदेख व स्याहार सुसारया निंतिं छगू चिकित्सकीय पुचः गठन यानाः छेँय् छेँय् हे उपचार टोलि छ्वयगु महानगरपालिकां न्ह्यथंगु दु ।