लकडाउनय् गां लिहां मवनेत मेयर शाक्यया इनाप

येँ । येँ महानगरपालिकाया मेयर विद्यासुन्दर शाक्यं थौं विक्रम संवत्या न्हूदँ २०७७ या लसताय् भिंतुना देछासें थःगु हे छेँजःपिं दुने जक सीमित जुयाः न्हूदँ न्यायेकेत सकल नगरवासीपिंत इनाप यानादीगु दु । विश्वन्यंकं न्यना वनाच्वंगु कोरोना भाइरसया कारणं सकलें छेँय् दुने हे लकडाउन अवस्थाय् लानाच्वंगु जुयाः न्हापा लिपा थें तःजिक न्हूदँ मन्यायेकेत नं वय्कलं इनाप यानादीगु दु ।

थौंकन्हय् लकडाउन उल्लंघन यानाः छुं छुं मनूत गामय् लिहां वनाच्वंगु खँ नं न्यने दयाच्वन धासें मेयर शाक्यं थ्व इलय् सुयातं नं येँ देय् त्वःताः गामय् मवनेत व येँय् च्वनेबलय् छुं कथंया समस्या दुसा थः च्वंच्वनागु वडाया ज्याकू वा मनपाया टोल फ्रि नं. ११८० स फोन यानाः ग्वाहालि कायेत नं इनाप यानादीगु दु ।

लकडाउनया इलय् येँ मनपां थौंकन्हय् थीथी वडा ज्याकू मार्फत राहत इनेगु, न्हिंन्हिं फोहोर मुना यंकेगु, वडा वडाय् की स्याइगु वासः छ्वाकेगु, ब्रुमरं लँ यचुपिचु यायेगु ज्या निरन्तर न्ह्याकाच्वंगु खँ न्ह्यथँसें न्हूदँ २०७७ पाखें सकले नेपाःमिपिंत कोरोनालिसे ल्वायेगु साहस व हःपाः चूलायेमा धकाः भिंतुना नं बियादीगु दु ।