चीनपाखें नेपाःया नाका बन्द
येँ (नेपालभाषा टाइम्स)÷चीनं म्हिगःनिसें नेपाःयात नाकाबन्दी याना बिउगु दु । चीन दुहां वनेगु नेपाःया तातोपानी व रसुवागढी निगुलिं नाका बन्द याना बिउगु खः । थ्व निगुलिं नाका बन्द जूगुलिं स्थलमार्ग जुयाः चीन–नेपाः वये वने ज्या नं बन्द जूगु दु ।
चीनं नेपाःयात छुं हे जानकारी मबिसे थथे नाकाबन्दी याःगु खँ धाःगु दु । नेपाःया तातोपानी भन्सार प्रमुख नारद गौतमं कनादी कथं बुधवाःनिसें चीनं आकाझाकां नेपाःया गाडी पना बिउगु खः । नाकाय् गाडी पने न्ह्यः चीनं नेपाः पक्षयात छुं जानकारी तकं मबिउगु खँ नं वय्कलं कनादिल ।
चीनपाखें नाकाबन्द याःगु खास कारण सी मदुसां हानं अप्वया वंगु कोरोना संक्रमणया कारणं थ्व पलाः ल्ह्वंगु जुइमाः धकाः अनुमान याःगु दु । थौंकन्हय् हानं कोरोनाया विरामी अप्वयेवं चीनं थःगु देशय् नापं कडाइ याना हःगु दु । थगुने नं कोरोना संक्रमण अप्वयेवं चीनं नेपाःया निगुलिं बन्द यानाः कडा निगरानी तःगु खः । कोरोनाया अवस्था सामान्य जुइधुंकूसां नं चीनं नेपाःया नाकायात धाःसा पूवंक खुल्ला मयाःगु कारणं याउँक सामान हयेत थाकुयाच्वंगु खँ धाःगु दु ।
आः नं आकाझाकां नाका बन्द याना बिउगु कारणं सामान ज्वनाः नेपाःपाखे वयाच्वंगु आपालं गाडी लँय् हे थानाच्वंगु खँ व्यवसायीतय्सं धाःगु दु । अज्याःगु लोड गाडीइ खास यानाः ध्वगी फइगु सामान तया हःगु लात धाःसा लँय् हे सामान ध्वगिनाः तःधंगु नोक्सान जुइ फइगु चिउताः सम्बन्धित व्यवसायीतय्सं प्वंकूगु दु ।
थगुने नं कोरानाया कारणं गाडी पना बिउगुलिं नेपाःया व्यापारीतय्गु आपालं सामान अथे हे जुयाः नोक्सान जूगु खः । लिपा अज्याःगु ट्रक त्वःतकेगु लागिं तकं ध्यबा घुस नके माःगु अवस्था वःगु खः ।
LEAVE YOUR COMMENTS