
यल – नेवाः मिसा दबूया स्वक्वःगु बुन्हि हनाज्याझ्वः वंगु शनिवाः जुल । देय्न्यंकंया नेवाः मिसातय्त संगठित यानाः इमित आर्थिक, सामाजिक, सांस्कृतिक व राजनीतिक रुपं सक्षम यानाः न्ह्यःने यंकेगु ल्याखं नीस्वनातःगु दबूया बुन्हि हनाज्याझ्वः दबूया नायः रश्मिला प्रजापतिया सभापतित्वय् जूगु खःसा ज्याझ्वःया उलेज्या मूपाहां प्रदेश नं. ३या सांसद शोभा शाक्यं यानादीगु खः ।
दबूया न्वकु कस्तुरी श्रेष्ठं लसकुस यासें न्ह्याःगु ज्याझ्वलय् निम्ह मिसा व्यक्तित्वयात हनेज्या व छम्हेसित रत्नदेवी प्रजापति सिरपाः नं लःल्हाःगु खः ।
वंगु खुगू दशक न्ह्यवंनिसें नेपालभाषा आन्दोलनय् मदिक्क थःत पाना वयाच्वनादीम्ह नापं साहित्य सिर्जना व राजनीतिक ख्यलय् नं उतिकं सक्रिय जुया च्वनादीम्ह सुवर्णकेशरी चित्रकार, सुक्ष्म विज्ञानय् विद्यावारिधि यानादीम्ह नापं लोकसेवा आयोगया न्हापांम्ह मिसा अध्यक्ष डा. कयोदेवी यमियात दबुलिं हनेज्या याःगु खः ।
अथे हे वंगु छगू दशक न्ह्यवंनिसें नेवाः मिसा अधिकारया निंतिं क्रियाशील जुया च्वनादीम्ह नापं राष्ट्रिय योजना आयोगया पुलांम्ह दुजः मय्जु इन्दिरा श्रेष्ठयात ‘रत्नदेवी श्यामदास प्रजापति ट्रष्ट’पाखें झिद्वःतका दांया रत्नदेवी प्रजापति सिरपाः लःल्हाःगु खः ।
नेवाः देय् दबूया मूछ्याञ्जे माइलाबाबु द्यःला, नेपाल संवत् न्हूदँ राष्ट्रिय समारोह समिति–११४०या नायः रमेश महर्जन, नेपालभाषा मंकाः खलः यलया नायः ऋषिप्रसाद श्रेष्ठ लगायतं भिंतुना न्वचु बियादीगु ज्याझ्वलय् दबूया दांभरिं अर्चना तण्डुकारं सुभाय् देछानादीगु खः ।
LEAVE YOUR COMMENTS