यल महानगरपालिकाय् प्रदुषणया मुद्दा

यल- यल महानगरपालिकाय् प्रदूषणया मुद्दा वयेगु क्रम शुरु जूगु दु । उपप्रमुखया नेतृत्वय् दुगु न्यायिक समितिया नियमित इजलास च्वनेवं प्रदूषणया मुद्दा लाःगु खः । नगर दुने व पिने थीथी उद्योगं यानाच्वंगु प्रदूषण बारे मुद्दा वयेगु यानाच्वंगु खँ समितिया दुजः ज्ञानभक्त डंगोलं कनादीगु दु ।

तःधंगु उद्योगं यानाच्वंगु ध्वनी व वायु प्रदूषण, वधशालां न्यंकाच्वंगु प्रदूषण, बंगुर लगायत थीथी जनावरया हुनिं नवयाच्वंगु समस्यायात कयाः मुद्दा दर्ता यायेगु क्रम अप्वया वनाच्वंगु खँ धाःगु दु ।

महानगरपालिकां प्रदूषण सम्बन्धी मुद्दाय् वडाया प्रतिनिधि लिसें स्थलगत निरीक्षण व अध्ययन यायेगु खँ डंगोलं कनादीगु दु । वय्कलं प्रदूषण नियन्त्रण ऐनया कथं मुद्दा न्ह्यःने न्ह्याकेगु खँ कनादीगु दु । वय्कलं धयादी, ‘प्रदूषण म्हो यायेत कुतः यायेगु वा उद्योग मेथाय् तयेगु धइगु विकल्प मालाः जक निर्णय यायेगु ज्या जुयाच्वंगु दु ।’

वय्कःया कथं न्यायिक समितिं निर्णय यायेमफुगु मुद्दा जक अदालतय् छ्वयेगु यानाच्वनागु खँ कनादी । महानगरपालिकाय् सार्वजनिक सम्पत्ति सम्बन्धी, पारिवारिक, लः, पर्ति जग्गा, ऐतिहासिक धरोहर लगायतया मुद्दा नं दर्ता जुयाच्वंगु दु ।