त्रिभुवन विमानस्थलय् बुद्धया प्रतिमा

येँ – त्रिभुवन अन्तर्राष्ट्रिय विमानस्थलयात बुटिक विमानस्थलय् रुपान्तरण यायेत थीथी ज्या जुयाच्वंगु दु। थ्वहे झ्वलय् म्हिगः विमानस्थलया आगमन क्षेत्रय् बुद्धया प्रतिमा थापना याःगु दु ।

संस्कृति, पर्यटन तथा नागरिक उड्डयन मन्त्री योगेश भट्टराईं प्रतिमाया उलेज्या यानादीगु खः । थ्व प्रतिमा अथे हे १ टन झ्यातु । प्रतिमाया च्वय्या ब्वय् अग्रेजी भासं ‘भगवान बुद्ध बूगु भूमिइ लसकुस दु’ धकाः च्वयातःगु दु । नेपाल भ्रमण दँ २०२० यात लक्षित यासें विमानस्थलयात बुटिक दयेकेगु ज्या जुयाच्वंगु खः । विमानस्थलय् क्यबया व्यवस्थापन लिसे गैंडाया मूर्ति तयेगु ज्या जुइधुंकूगु दु। उकथं हे विमानस्थलया टर्मिनलया अप्वः धइथें थासय् कलात्मक मूर्ति व काष्ठकलाया सामाग्री ब्वये हःग दु।

न्हापा त्रिभुवन विमानस्थलय् स्वदेशी व विदेशी यात्रुवाहकपिंसं आपालं कथंया समस्या फयेमालाच्वंगु खःसा आः अज्याःगु समस्या म्हो जुया वनाच्वंगु खँ धाःगु दु । सरकारं सन् २०२० सं २० लाख पर्यटक दुकायेगु आज्जु कथं भ्रमण दँ घोषणा यायेधुंकूगु दु। थ्वहे झ्वलय् विमानस्थलयात थप सुधार यायेगु कथं न्हिथँ ज्या जुयाच्वंगु दुसा विमानस्थलयात थप स्तरीकरण यायेगु जक मखुसें पर्यटकयात अःपुक सेवा बीगु कथं सुधार यायेगु खँ धाःगु दु ।