किपू नपायात स्वास्थ्य सामग्री ग्वाहालि

किपू- किपू नगरपालिकायात थीथी स्वास्थ्य सामग्री लःल्हाःगु दु । कोरोनाया निगूगु लहरया संक्रमण अप्वया वनेवं रिसर्ज नेपाल नांया संस्थां नगरपालिकायात थीथी स्वास्थ्य सामग्री लःल्हाःगु खः ।

किपू नगरपालिकाया भवनय् जूगु छगू ज्याझ्वःया दथुइ किपू नगरपालिकाया प्रमुख रमेश महर्जनयात संस्थाया नेपाल निर्देशक डा. शंकरमान राईं उगु स्वास्थ्य सामग्री लःल्हानादीगु खः ।

संस्थां पीपीइ, सर्जिकल मास्क, फेसशिल्ड, ग्लोब्स, स्यानिटाइजर, पेसेन्ट मोनिटर, सिरप पम्प, अक्सिजन सिलिन्डर, इन्फ्रारेड थर्मोमिटर लगायतया स्वास्थ्य सामग्री किपू नगरपालिकायात लःल्हाःगु खः ।

उगु इलय् किपू नपा प्रमुख महर्जनं संस्थापाखें प्राप्त स्वास्थ्य सामग्री कीर्तिपुर अस्पताल व किपूया स्वास्थ्य चौकियात उपलब्ध याकेगु जानकारी बियादीगु खः । उपप्रमुख सरस्वति खड्कां स्वास्थ्य सामग्री ग्वाहालिया निंतिं संस्थाप्रति आभार प्वंकादीगु खः ।

उगु इलय् किपू नगरपालिका वडा नं. ३ या वडाअध्यक्ष राजेन्द्र महर्जन, स्वास्थ्य शाखा प्रमखु सन्तमान मानन्धर व फेक्ट नेपालया प्रतिनिधि गौरी प्रधानया नं उपस्थिति दुगु खः ।