भिंद्यःया देगः पुनःनिर्माणय् ग्वाहालि याःपिंत सम्मान

यल(नेपालभाषा टाइम्स)- थनया मंगलबजारय् च्वंगु नांजाःगु ऐतिहासिक भिंद्यःया देगः पुनःनिर्माण क्वचाःगु लसताय् छगू ज्याझ्वः जुल । भिंद्यःया देगः पुनःनिर्माण क्वचाःगु लसताय् थीथीकथं ग्वाहालि यानादीपिंत हनेज्या याःगु खः । २०७२ बैशाख १२ गतेया विनाशकारी भुखाचं क्षति जूगु देगः पुनःनिर्माण क्वचाःगु लसताय् भिमसेन मन्दिर पुनःनिर्माण उपभोक्ता समितिया ग्वसालय् जूगु ज्याझ्वलय् पुनःनिर्माणय् थीथीकथं ग्वाहालि याःपिंत सम्मान याःगु खः ।

यल लाय्कू लागाय् च्वंगु देगः उपभोक्ता समिति गठन यानाः उपभोक्ता मोडलपाखें पुनःनिर्माण याःगु खः । समितिं पाटन संग्रहालय परिसरय् ग्वसाः ग्वःगु ज्याझ्वलय् यल महानगरपालिकाया प्रमुख चिरिबाबु महर्जनं देगः पुनःनिर्माण यानादीपिं कालिगढ, ज्याकःमिनापं थीथी कथं ग्वाहालि यानादीपिंत सम्मान यानादीगु खः ।

अथे हे देगः पुृनःनिर्माणय् आर्थिक रुपं ग्वाहालि यानादीपिं दातालिसें प्राविधिक रुपं ग्वाहालियाःगु पुरातत्व विभाग, यल महानगरपालिका, मंगल टोल सुधार समिति, थीथी संघसंस्थायात नं सुभाय् देछासे सम्मान याःगु खः ।

ललितपुर उद्योग वाणिज्य संघया सक्रियताय् गठन यानातःगु समितिया अध्यक्ष कृष्णलाल महर्जनं सम्पदा संरक्षणय् स्थानीवासीया ग्वाहालि व भूमिका महत्वपूर्ण जू धइगुया प्रमाण भिंद्यःया देगः पुनःनिर्माणं प्रमाणित याःगु दु धयादिल ।

भिंद्यःया उगु देगः मुक्कं ४ गू करोड ९३ गू लख तका दामं पुनःनिर्माण याःगु खःसा उकी अप्वःथें ग्वाहालि जनस्तरं याःगु खः ।