भारतयाके जक पेट्रोल न्याये कथं पाइप लाइन

येँ – प्रधानमन्त्री केपी ओली थम्हं हे न्हापा यानातःगु घोषणाया अःखः जुइक भारतलिसे सम्झौता यायेत्यंगु खँ सीदुगु दु ।
प्रम ओलीं वंगु मंसिर ४ गते उद्योग वाणिज्य महासंघं ग्वसाः ग्वःगु ज्याझ्वलय् न्ववासें भारतीय कम्पनीया एकाधिकार जुइ कथं पाइप लाइन विस्तार मयायेगु खँ धयादीगु खः । अबले वय्कलं वामपन्थीतय्गु सरकार वल धाःसा रक्सौल–अमलेखगञ्ज पाइप लाइन खारेज यायेगु जुइ धयादीगु खः । तर आः वय्कः प्रधानमन्त्री जुइधुंकाः धाःसा झिंन्यादँ तक भारतयाके जक पेट्रोलियम पदार्थ न्यायेगु शर्त सहित मोतिहारी–अमेलेखगञ्ज पेट्रोलियम पाइप लाइनया शिलान्याश यायेत्यंगु दु । मेगु वालय् भारत भ्रमणय् वनेत्यंम्ह प्रम ओली व भारतीय प्रधानमन्त्री नरेन्द्र मोदीं उकिया मंकाः शिलान्याश यानादी ।

विश्व व्यापार संगठन (डब्ल्युटिओ)या बैठकय् ब्वति कयाः लिहां वःम्ह उद्योग वाणिज्य लिसें आपूर्ति मन्त्री मातृका यादवं प्रमया भारत भ्रमणया झ्वलय् मंकाः शिलान्याश यायेगु तयारी जुयाच्वंगु खँ धयादीगु खः । नेपाल आयल निगमया निमित्त कार्यकारी निर्देशक सुशिल भट्टराईनं भारतया मोतिहारीनिसें नेपाःया अमलेखगञ्ज तक लायेत्यंगु पाइप लाइनया शिलान्याश यायेगु ई जूगु खँ कनादिसें उकियात माःगु इक्वीप्मेन्ट वयेधुंकूगु दु व आः तक ३६ किलोमिटर पाइप दुहां वयेधुंकूगु दु जानकारी नं बियादी ।

रारा तालं देशवासीयात सन्देश
प्रधानमन्त्री केपी ओलीं थुगुसी रारा तालय् च्वनाः न्हूदँया सन्देश कथं देशवासीया नामय् सम्बोधन यानादीगु जूगु दु । ६ नम्बर प्रदेशं यायेत्यंगु पर्यटन महोत्सवया उलेज्या यायेत उखे झायेत्यंम्ह वय्कलं न्हूदँ कुन्हु देशवासीया नामय् सम्बोधन नं अनं हे जारी यानादीत्यंगु खः । म्हिगः जूगु जिफन्टया ज्याझ्वलय् प्रम ओलीं हे थ्व खँ कनादीगु खः ।