राउतयात बर्खास्त यायेगु कुतः ?

२ नम्बरया प्रदेश सरकार व संघीय सरकार टक्कर

येँ – छु प्रदेश सरकारं प्रदेश नम्बर २ या मुख्यमन्त्री लालबाबु राउतयात बर्खास्त यायेत्यंगु खः ? थौंकन्हय् प्रधानमन्त्री केपी ओली लगायत एमालेया मेमेपिं मन्त्री व नेतातय्सं मुख्यमन्त्री राउतं जनकपुरय् भारतीय प्रधानमन्त्रीया न्ह्यःने न्ववानादीगु भाषणयात कयाः लगातार आलोचना यानाच्वंगु कारणं राजनीतिइ थ्व न्ह्यसः नं पिहां वःगु दु ।

मुख्यमन्त्री राउतं भारतीय प्रमया न्ह्यःने ‘संविधान संशोधनया थःपिनि आन्दोलन जारी हे दनि’ धकाः न्ववानादीगु खँयात सत्तारुढ पार्टी एमालें आपत्तिजनक तायेकूगु दु । लिसें वहे इलय् ब्वयेकूगु नेपाःया ध्वाँय्या आकार मिले मजू धकाः नं कडा आलोचना जुयाच्वंगु दु ।

थज्याःगु पृष्ठभूमिइ संघीय सरकारं राउतया सरकार हे भंग यायेगु नियतं न्ह्याः वःगु खः लाकि धइगु आशंका राजनीतिक ख्यलय् याना हःगु दु । देशय् दुगु न्हय्गू प्रदेश मध्ये एमाले–माओवादी गठबन्धनया सरकार मदुगु प्रदेश थ्वहे छगू जक खः । थन नं थःगु राज चले यायेत एमालें थ्व ‘राष्ट्रवादी’ अभियान न्ह्याकूगु खः लाकि धइगु आशंका थन यानाहःगु दु ।

संघीय सरकारं याना हःगु आलोचनायात उकुन्हु तक मुख्यमन्त्री राउत याकःचां प्रतिवाद यानाच्वंगु खःसा आः वय्कःया बचाउ यायेत पार्टीया अध्यक्ष उपेन्द्र यादव समेत खने दयेकः वःगु दु । अध्यक्ष यादव लिसें सहअध्यक्ष राजेन्द्र श्रेष्ठं मुख्यमन्त्री राउतया अभिव्यक्ति सरकार व पार्टीया लाइन कथं हे वःगु खः धकाः वय्कःया बचाउ यानादीगु दु ।

थ्वहे इलय् मुख्यमन्त्री राउतं नं संघीय सरकारया अज्याःगु हे नियत खःसा फुसा थःत कारवाही यानाः क्यँ धकाः हाथ्या समेत बियादीगु दु । यदि संघीय सरकारं प्रदेश सरकार भंग यात धाःसा अन राष्ट्रपति शासन चले जुइ गुकिया नियन्त्रण प्रधानमन्त्रीं याइ ।