फास्ट ट्राय्कय् गुथिया जग्गा

गुथियारत चिन्तित तर जात्राय् लिच्वः मलाइगु दावी

येँ – येँ–निजगढ फास्ट ट्राय्क दयेकेगु झ्वलय् गुथि संस्थानया ४० निसें ५० रोपनी जग्गा अधिग्रहणय् लाइगु खँ सीदुगु दु । गुथि संस्थानया अधिकृत शैलेन्द्र पौडलया कथं आः तक थुलि हे जग्गा लाइ धकाः स्पष्ट मजूसां नं म्होति नं उलि जग्गा अधिग्रहणय् लायेफइगु जानकारी नेपालभाषा टाइम्सयात बियादीगु दु ।

आः तक १० रोपनी ति जग्गा अधिग्रहणय् लायेधुंकूगु खँ कनादिसें अधिग्रहणय् लाःगु जग्गापाखें संस्थानयात ४ करोड तका ध्यबा दुहां वयेधुंकूगु जानकारी नं वय्कलं बियादीगु दु । गुथिया ८० निसें ९० कित्ता जग्गा अधिग्रहणय् लाःगु धासें उकिया पूवंक ल्याःचाः तयेगु ज्या धाःसा ल्यनाच्वंगु खँ नं वय्कलं कनादिल ।

गुथिया जग्गा अधिग्रहण लिपा मोहीयात नं उकिया भाग बीमाःगु खँ कनादिसें वय्कलं स्वब्वय् निब्व गुथियात व ल्यं दनिगु छब्व मोहीयात वनीगु जानकारी बियादिल । थीथी जात्रा पर्व न्यायेकेगु निंतिं ल्यनाच्वंगु गुथिया जग्गा आः अधिग्रहण लिपा जात्रा पर्व न्ह्याकेत समस्या जुइफइगु धाःगु दु ।

फास्ट ट्राय्कय् लाःगु आपालं जग्गा बुंगद्यः लिसे सम्बन्धित जूगुलिं लिपा वनाः द्यः जात्रा यायेत समस्या जुइफुगु खँ गुथियारतय्सं धाःगु दु । गुथियार गोपाल महर्जनं थःपिंसं ज्यानाच्वनागु बुँ मदयेधुंकाः गुकथं ज्या यायेगु धासें थुकिया निंतिं सरकारं ध्यान बीमाःगु बिचाः प्वंकादिल ।

फास्ट ट्राय्क दयेकेगु झ्वलय् थःपिंसं ज्यानाच्वनागु २० रोपनी स्वयां अप्वः जग्गा अधिग्रहणय् लाःगु खँ कनादिसें वय्कलं आः बुँ मदइगु खःसा थःपिंसं निःशुल्क रुपं ज्या याये मफइगु व जग्गाया पलेसा मेगु जग्गा व्यवस्था यायेमाःगु माग नं यानादीगु दु ।

मेखे गुथि संस्थानं जात्रा पर्वया निंतिं माःगु ध्यबाया व्यवस्थापन याना वयाच्वंगुलिं जात्रा न्यायेकेत धाःसा समस्या मजुइगु खँ धाःगु दु । जात्रा पर्व न्यायेकेगु निंतिं गुथि संस्थानं सम्बन्धित गुथियारतय्त ध्यबा हे बियाच्वंगुलिं लिपा नं आर्थिक ग्वाहालि यायेगुली समस्या मजुइगु खँ धाःगु दु ।

सम्बन्धित बुखँ

LEAVE YOUR COMMENTS