बागिश्वरीया निगू भवनया उलेज्या
ख्वप(नेपालभाषा टाइम्स)- बागिश्वरी माध्यमिक विद्यालयया नवनिर्मित निगू भवनया उलेज्या वंगु मंगलवाः याःगु दु । ख्वप नगरपालिकाया प्रमुख सुनिल प्रजापतिं ख्वपया च्याम्हासिंह व कमलविनायकय् दयेकूगु विद्यालयया निगू न्हूगु भवनया सिजःपौ अनावरण यानाः मंकाः उलेज्या यानादीगु खः ।
ज्याझ्वलय् नवासें नगर प्रमुख प्रजापतिं बागिश्वरी मावि ख्वपया जक मखसे देय्या हे छगू नमूना विद्यालय जूगु चर्चा यानादिसें सामुदायिक शिक्षाय् विद्यार्थीतय् न्हापांगु प्राथमिकताय् लायेत सफल बागिश्वरीइ नर्सरीनिसें स्नातकोत्तर तह तकया अध्ययन अध्यापन जुयाच्वंगु जानकारी बियादिल ।
देशय् जुइगु गुगुं कथंया नं बन्द हडतालय् ख्वपया शिक्षण संस्थात बन्द मजुइगु धइगु हे ख्वपया शैक्षिक ख्यःया विशेषता जूगु धासें वय्कलं देय्या शैक्षिक संस्थातमध्ये ख्वप नगरपालिकापाखें संचालन जुयाच्वंगु शैक्षिक संस्थाया शिक्षण गुणस्तरं च्वन्ह्याना वनाच्वंगु दु धयादिल ।
वय्कलं नवनिर्मित न्हूगु भवनया फक्व अप्वः उपयोग यानाः विद्यार्थीतय्त गुणस्तरीय शिक्षा बीत पे्ररित यासें नगरपालिका सामुदायिक विद्यालयया शिक्षायात प्राथमिकताय् बियाः न्ह्यःने यंकाच्वनागु दु धयादिल ।
बागिश्वरी माध्यमिक विद्यालय व्यवस्थापन समितिया अध्यक्षनापं ख्वप नगरपालिका ९ वडाअध्यक्ष रवीन्द्र ज्याख्वं बागिश्वरीं देय्या शैक्षिक ख्यलय् उल्लेखनीय प्रगति यानाच्वंगु चर्चा यानादिसें गुगु उद्देश्यं विद्यालय भवन निर्माण जूगु खः, उगु उद्देश्य प्राप्तिया निंतिं विद्यालयया शिक्षक, कर्मचारी सकलें दत्तचित्त जुयाः न्ह्याः वनीगु विश्वास प्वंकादिल ।
विद्यालयया प्रधानअध्यापक कृष्णप्रसाद धन्छां भवन निर्माणया आय व्यय विवरण न्ह्यब्वयादिसें नवनिर्मित न्हूगु भवन याकनं व्यवस्थित रुपं संचालन यायेगु जानकारी बियादिल ।
शिक्षा विज्ञान तथा प्रविधि मन्त्रालय, राष्ट्रिय पुनःनिर्माण प्राधिकरण, केन्द्रीय आयोजना कार्यान्वयन इकाई (शिक्षा)पाखें निर्माण जूगु विद्यालयया नवनिर्मित भवनया ताःचा डीएलपीआइयुया प्रमुख रमेश मैनालीं ख्वप नगरपालिकाया प्रमुख प्रजापतियात लःल्हानादीगु खःसा लिपा नगर प्रमुख प्रजापतिं उगु ताःचाः विद्यालय व्यवस्थापन समितिया नायःनापं वडाअध्यक्ष ज्याख्वंयात लःल्हानादीगु खः ।
LEAVE YOUR COMMENTS