ख्वपय् सापारुया तःजिगु तयारी

ख्वप(नेपालभाषा टाइम्स)- थुगुसी सापारु तःजिक हनेगु निंतिं तयारी जुयाच्वंगु दु । निदँ तक कोरोनाया कारणं औपचारिकताय् जक सीमित जूगु सापारु नखः थुगुसी सभ्य व भव्य रुपं हनीगु जूगु दुसा व हे ल्याखं तयारी नं जुयाच्वंगु दु ।

ख्वप नगरपालिकां थुगुसी सापारु तःजिक हनेत सर्व साधारणयात आह्वान याःगु दु । वइगु साउन २७ गते शुक्रवाःकुन्हु तःजिक सापारु नखः हनेत आह्वान यासे सापारु चाःहिलीगु लँपुयात मार्ग प्रशस्त यायेत नं इनाप याःगु दु । नगरपालिकां नगर दुने सापारु चाःहिलीगु लागाय् च्वंगु निर्माण सामग्री लगायत दक्वं सामग्री चिइकेत धासें सम्बन्धित निकाययात उकिया निंतिं निर्देशन नं बिउगु दु ।

ख्वप नगर प्रमुख सुनिल प्रजापतिं वंगु निदँतक कोरोनाया कारणं औपचारिकताय् जक सीमित जूगु सापारु नखः थुगुसी व्यवस्थित व मर्यादित रुपय् हनेत इनाप यासें सापारु चाःहिलीगु लँपुयात सुचुकुचु यायेत इनाप यानादिल । लिसें वय्कलं सापरुया लँपुइ लाःगु विद्युत, टेलिफोन, केबुल, इन्टरनेट लगायतया तारयात व्यवस्थित यायेत नं सम्बन्धित दक्वं निकाययात इनाप यानादीगु दु ।

सापारु चाःहिलीगु लँपु खाली यायेत व थीथी प्रयोजनया निंतिं तयातःगु तार व्यवस्थित यायेत छगू समिति नं गठन याःगु दु । ९ वडाअध्यक्ष रविन्द्र ज्याख्वःया संयोजकत्वय् सायाः वनीगु लँपुइ च्वंगु तार व्यवस्थापनलिसें आवश्यक समन्वय व अनुगमन यायेगु ल्याखं न्हय्म्हेसिया समिति गठन याःःगु खः । नगरपालिकां सम्बन्धित निकायया प्रमुखतलिसे जूगु सहलहया इलय् साउन २० गतेया दुने दक्वं तार व्यवस्थापन यायेत धाःगु दु ।

साउन २० दुने तार व्यवस्थापन यायेगु ज्या मजुल धाःसा नगरपालिका थम्हं हे यायेगु व उकिया वापत जूगु खर्च व जरिवाना सम्बन्धित पक्षपाखें हे असुल उपर यायेगु नगर प्रमुख प्रजापतिं कनादिल ।

सापारु मर्यादित व व्यवस्थित रुपं संचालनया निंतिं थुगु ज्याय् सकसिनं ग्वाहालि यायेत इनाप यानादिसें सरोकारवाला पक्षं नं थःथःगु थासं आवश्यक भूमिका, सहकार्य व समन्वय यायेत इनाप यानादीगु दु ।

अथे हे सापारुकुन्हु सायाः न्ह्यानाच्वनीगु अवधि तक विद्युत आपूर्ति बन्द मयायेत नं नेपाल विद्युत प्राधिकरणयात इनाप याःगु दु । सायाःया इलय् प्रदर्शन याइगु घिन्तांघिसि प्याखं व मेमेगु सांस्कृतिक ब्वज्या देश, विदेशय् च्वंपिंसं नं अःपुक अवलोकन याये खनेमा धइगु ल्याखं टेलिभिजन, सामाजिक संजालपाखें प्रत्यक्ष प्रशारणया व्यवस्था यायेत नं नगरपालिकां आह्वान याःगु दु ।