ल्हारक्याल बारे कांग्रेसय् चर्चा
येँ (नेपालभाषा टाइम्स)- उपप्रधान लिसें रक्षा मन्त्री पूर्णबहादुर खड्कां लुम्बिनी विकास कोषया उपाध्यक्षय् ल्हारक्याल लामा नियुक्त याःगु खँयात कयाः थम्हं प्रधानमन्त्रीया ध्यानाकर्षण यायेधुनागु खँ कनादीगु दु । म्हिगः कांग्रेस संसदीय दलया बैठकय् न्ववासें वय्कलं ल्हारक्याल लामाया नियुक्ति बारे थम्हं लिपा जक सिउगु खँ धयादीगु खः ।
म्हिगःया बैठकय् महामन्त्रीपिं गगन थापा व विश्वप्रकाश शर्मा लगायत मेमेपिं सांसदतय्सं नं ल्हारक्यालया नियुक्तियात कयाः न्ह्यसः थंगु खःसा उकियात लिसः बिसें वय्कलं धयादिल, ‘मन्त्री जुइधुंकूपिं गुलिखे माननीयतय्सं सिउ जुइ, गुगुं निर्णय सम्बन्धित मन्त्रालयया मन्त्रीबाहेक मेपिंसं सीमखु । प्रधानमन्त्री व मुख्यसचिव च्वनाः निर्णय च्वकी, जिमिसं सी हे मखु । सीधुंकाः प्रधानमन्त्रीया ध्यानाकर्षण यानागु दु ।’
वंगु छवाः न्ह्यः जक मन्त्रिपरिषदं लुम्बिनी विकास कोषया उपाध्यक्षय् ल्हारक्याल लामायात नियुक्ति याःगु खःसा थुकियात कयाः यक्वस्यां असन्तुष्टि प्वंकाच्वंगु दु ।
मेखे नियुक्त लिपा पत्रकार सम्मेलन हे यासें लामां थम्हं बुद्धया सिद्धान्त कथं ज्या यायेगु जुइ, भ्रष्टाचार याये मखु, मखुगु ज्या याये मखु धकाः सार्वजनिक रुपं अभिव्यक्ति बियादीगु दु । वय्कलं थःत बियातःगु फुक्क द्वपंयात अख्तियारपाखें फय्गं खः धकाः धायेधुंकाः नं छाय् थःगु विरोध यानाच्वंगु धकाः नं न्ह्यसः तयादीगु दु ।
छुं न्हि न्ह्यः जूगु छगू सभाय् न्ववासें लामां नेपालय् बुद्धिष्ट, इसाइ, मुस्लिम धर्म माने याइपिंसं हिन्दू धर्म विरुद्ध आन्दोलन यायेमाल धकाः थःत प्रस्ताव तःगु व थम्हं उकियात अस्वीकार यानाः विरोध यायेगु मखु, मिले जुयाः वनेमाः धकाः खँ तयागु जानकारी बियादीगु खः ।
LEAVE YOUR COMMENTS