व्यापारीतपाखें निषेधाज्ञाया अवज्ञा

कडा लकडाउन यायेमालीगु सिडिओया ख्याच्वः

येँ (नेपालभाषा टाइम्स) – स्वनिगःया व्यापारीतय्सं निषेधाज्ञायात अवज्ञा याःगु दु। स्वनिगःया स्वंगू जिल्ला येँ, यल व ख्वप जिल्ला प्रशासन कार्यालयं कोरोना संक्रमणया महामारी खनेदुगुलिं अझं निषेधाज्ञा जारी दनिगु धासें पसः चायेकेगु निंतिं थीथी हलंज्वलंया थीथी बार तोके यानाः निषेधाज्ञायात ह्वालुकूगु खः ।

अथे खःसां स्वनिगःया बजारय् जिल्ला प्रशासन कार्यालयया आदेशयात अवज्ञा यासें फुक्क धयाथें पसः चायेकेगु याना वयाच्वंगु दु। थ्व झ्वलय् म्हिगः सोमवाः नं येँया असं, न्यूरोड थेंज्याःगु मू मू बजारय् खाद्यान्न, बसजाः, रेडिमेडि पसः, कापः पसः फुक्क फुक्क धयाथें न्हिछियंकं चायेकूगु दु ।

वंगु बिहिवाः जारी याःगु न्हूगु निषेधाज्ञाय् खाद्यान्न पसः नं सुथय् ११ बजे तक व बहनी ५ बजे निसें ७ बजे तक जक चायेकेगु धयातःगु खः । अथेखःसां असं थेंज्याःगु मू मू बजारय् हे न्हिछि धयाथें खाद्यान्न पसः चालाच्वंगु दु। पसःत फुक्क धयाथें चाःसां सार्वजनिक यातायातय् धाःसा निषेधाज्ञायात पालना जुयाच्वंगु दु ।

जिल्ला प्रशासन कार्यालयया निर्देशन कथं हे आः सार्वजनिक यातायातय् तग्वःगु बस जक चले जुयाच्वंगु खनेदुसा माइक्रो, सफा टेम्पु चले जूगु मदुनि । सार्वजनिक यातायातय् ट्राफिकतय् निगरानी अप्वः दइगुलिं यानाः नं निषेधाज्ञाया पालना जुयाच्वंगु खः । मखुसा यातायात व्यवसायीतय्सं नं फुक्कं सार्वजनिक यातायात चायेकेमाल धकाः माग यानाच्वंगु यक्व दयेकेधुंकूगु दु ।

थ्व हे दथुइ येँया प्रमुख जिल्ला अधिकारी (सिडिओ) जनकराज दाहालं थथे निषेधाज्ञायात अवज्ञा यानाच्वन धाःसा हाकनं कडा रुपं निषेधाज्ञा जारी यायेमालीगु खँ धयादीगु दु। वय्कलं आः तयातःगु निषेधाज्ञा सरकारया निंतिं मखुसे सर्वसाधारण जनताया हे स्वास्थ्ययात ध्यानय्त याः यानागु जूगुलिं थुकी थःपिं हे सचेत जुयाः पालना यायेमाःगु खँ धयादीगु दु ।

व्यवसायीतय्सं धाःसा ताःहाकः लकडाउनं यानाः थःपिनिगु व्यापार व्यवसाय हे खतम जुइधुंकूगु धासें निषेधाज्ञाया यायेमजिउगु खँ धयाच्वंगु दु। निषेधाज्ञाया कारणं फुक्क बन्द जुयाच्वंगुलिं पसतलय् दुगु सामान फुक्क स्यना वनाच्वंगु, पसःया बाः पुले मफयेधुंकूगु लिसें थःपिनि नयेत्वनेत तकं समस्या वयेधुंकूगु खँ धयाच्वंगु दु ।

राष्ट्रिय व्यवसायी महासंघं धाःसा थःपिंसं निषेधाज्ञा आदेश कथं हे पसः चायेकेगु यानाच्वनागु खँ धाःगु दु । महासंघया नायः नरेश कटुवालं यदि सुना नं आदेश विपरीत पसः चायेकल धाःसा थःपिंसं नं कारवाही यायेगु खँ धयादीगु दु ।

थ्वहे दथुइ यातायात व्यवस्था विभागं मापदण्डय् च्वनाः फुक्क कथंया सार्वजनिक यातायात चले यायेफइगु खँ धाःगु दु । विभागं यातायात व्यवसायी, यातायात मजदूरतलिसे खँ ल्हानाः सार्वजनिक यातायात संचालन यायेगु मापदण्ड तयार यानाः भौतिक निर्माण तथा यातायात मन्त्रालयय् छ्वःगु दु ।