ब्वयेत्यंगु जहाजं हे मनू ज्वन
येँ (नेपालभाषा टाइम्स)÷ येँनं मुम्बई वनेत्यंगु जहाजय् आतंकवादी धकाः ज्वंपिं निम्ह मनूत वास्तवय् आतंकवादी मखुसें लुँवहःया ज्या याइपिं व्यवसायी जूगु खँ सीदुगु दु ।
नेपाल एयरलाइन्सया जहाजं मुम्बई वनेत्यंपिं सन्तोष लामिछाने व वया कलाः मीना लामिछानेयात आतंकवादी पुचःलिसे स्वापू दुपिं धइगु सुचं वःगु आधारय् म्हिगः प्रहरीं ब्वयेत्यंगु जहाज हे दिकाः ज्वना यंकूगु खः । जहाजय् आतंकवादीत च्वनाच्वंगु दु धइगु सुचं वयेवं प्रहरीं जहाज दिकाः छानबिन शुरु याःगु खः ।
तर जहाजं क्वकयाः ज्वना यंकूपिं थ्व निम्हतिपू लुँवहः व्यवसायी धइगु खँ सीदुगु दु । उमिसं लुँवहः बाहेक मेमेगु नं थीथी कथंया कारोवार याइगु जूगुलिं शंकाया
आधारय् उमित ज्वंगु खः । उमिगु बारे प्रहरीं थप अनुसन्धान न्ह्याकूगु दु । कैलालीया लामिछाने बारे कैलाली प्रहरीइ उजुर लानाच्वंगु दु । लामिछानेयात अन ठगी सम्बन्धी उजुरी नं लानाच्वंगु खँ धाःगु दु ।
लामिछाने तिपू मेपिं व्यवसायीतलिसे मुम्बई चाःहिलेत वनेत्यंगु खँ धाःगु दु । कैलालीया प्रहरीं थःपिनि प्रधान कार्यालयय् उमित आतंकवादी शंका यासें जानकारी याकेवं प्रहरीं उमित ब्वयेत ठिक्क जुइधुंकूगु जहाजय् दुहां वनाः क्वकासें हिरासतय् धाःगु खः ।
LEAVE YOUR COMMENTS