९३७ खा छेँ च्वने मजीक क्षति
येँ (नेपालभाषा टाइम्स)- जाजरकोटय् ब्वःगु भुखाचय् लानाः सीपिं मनूतय् ल्याः १५७ थ्यंगु दु । थुकी लानाः ९३७ खा छेँ पूर्ण रुपं क्षति जूगु दुसा मेगु २९५४ खा छेँ आंशिक रुपं क्षति जूगु दु । गृह मन्त्रालय अन्तर्गतया विपद् पूर्व तयारी तथा प्रतिकार्य शाखां सार्वजनिक याःगु तथ्याकं कथं पश्चिम नेपाःया जाजरकोट लगायत, रुकुम पूर्व, सल्यान, प्युठान, रोल्पा, दाङ, नवलपरासी व दैलेखय् छेँ क्षति जूगु दु । दकलय् अप्वः जाजरकोटय् जक ९०५ खा छेँ ज्वने मजीक क्षति जूगु दु । थ्व भुखाय्या केन्द्रविन्दु नं जाजरकोट हे खः । उगु थासय् जूगु क्षतिया ल्याः पिकायेगु ज्या जुया हे च्वंगु दनि । उकिं थ्व ल्याः अझ नं अप्वः जुइ फइगु खँ धाःगु दु ।
जाजरकोटय् थ्व भुखाय् ब्वःगुया कारण छु धकाः सीकेगु लागिं भुखाय्विद्तय्गु पुचः नं वनाच्वंगु दु । पश्चिम नेपालय् वंगु ५०० दँ न्ह्यवंनिसें तःधंगु भुखाय् मब्वःनिगु खँ विज्ञतय्सं धाःगु दु ।
सरकारं जाजरकोट भुखाचं पीडितया राहत व पुनस्र्थापनाया ज्याय् ग्वाहालिया नितिं आह्वान यायेवं थीथी थासं ग्वाहालि याइगु जूगु दु । सरकारं प्रधानमन्त्री दैवीप्रकोप उद्धार कोषपाखें ग्वाहालिया नितिं इनाप याःगु खः ।
थ्वहे झ्वलय् सरकारं भुखाचं ल्हानाः सीपिनि छेँजःपिंत २ लाख तका नगद राहत बीगु घोषणा याःगु दुसा वासः यानाच्वंपिंत निःशुल्क वासःया यायेगु व्यवस्था खँ नं सरकारं धाःगु दु ।
थ्वहे झ्वलय् नेपाली कांग्रेसया संसदीय बैठकं कांग्रेस संघीय सांसदया झिंन्यान्हुया तलब सरकारी राहत कोषय् बीगु निर्णय याःगु दु । उकथं हे नेपाल समाजवादी पार्टीं १० लाख तका राहत कोषय् बीगु घोषणा याःगु दु । माओवादी केन्द्रं ५० लाख तका राहत कोषयात बीगु घोषणा याःगु दु ।
उकथं राष्ट्रिय प्रजातन्त्र पार्टीं २५ लाख तका सरकारी राहत कोषय् बीगु घोषणा याःगु दुसा नेपाल नागरिक उड्डयन प्राधिकरणं १ करोड तका राहत बीगु घोषणा याःगु दु । उकथं हे निर्माण व्यवयसाय विकास परिषदं निर्माण व्यवसाय कोषं २५ लाख तका ग्वाहालि यायेगु खँ धाःगु दु ।
अथे हे भरतपुर नगरपालिकां १ करोड तका ग्वाहालिया घोषणा याःगु दुसा नेपाल चेम्बर अफ कमर्सं खाद्यान्न, त्रिपाल, वसः, सिलः, लासा व म्याट्रेस ग्वाहालि यायेगु घोषणा याःगु दु । चेम्बरया विपद् व्यवस्थापन कोष अन्तर्गत उगु सामाग्री ग्वाहालि यायेत्यंगु खः ।
उकथं हे बुटवल उपमहानगरपालिकां २५ लाख तका ग्वाहालि यायेगु घोषणा याःगु दु । थ्व स्वयां न्ह्यः चीन सरकारं १० करोड तकाया राहत सामग्री उपलब्ध याकेगु घोषणा यायेधुंकूगु दु ।
LEAVE YOUR COMMENTS