श्रीघः ज्ञानमाला भजनं भिक्षु अमृतानन्द महास्थविर लुमंकल

येँ – श्रीघः ज्ञानमाला भजन खलःया ग्वासलय् आचार्य भिक्षु अमृतानन्द महास्थविरया नीच्याक्वःगु गुणानुस्मरण दिवस हनेगु ज्या जुल । खलःपाखें तिथिकथं वंगु यंलाथ्व पारुकुन्हु आचार्य भिक्षु अमृतानन्दया गुणानुस्मरण दिवस हंगु खः । शील प्रार्थनापाखें न्ह्याःगु ज्याझ्वलय् भजन खलःया छ्यांजे अमीरमान शाक्यं सकसितं लसकुस यासें भिक्षु अमृतानन्दया म्हसीका बियादीगु खः ।

अथे हे शान्तरत्न शाक्यं श्रद्धेया भिक्षु अमृतानन्दया थीथी पक्षयात कयाः नुगःखँ प्वकादीगु खःसा भिक्षु अमृतानन्दं च्वयाबिज्याःगु छपु भजन खलःया उपाध्यक्ष माणिकरत्न शाक्यं हालाः न्यंकादीगु खः ।

ज्याझ्वःया दकलय् लिपा आचार्य भिक्षु अमृतानन्दया किपाय् खलःया सकल दुजः नापं उपस्थित सकसिनं स्वां देछानाः श्रद्धाञ्जली देछाःगु खःसा पुण्यानुमोदन यासें ज्याझ्वः क्वचायेकूगु खः ।वसपोल आचार्य भिक्षु अमृतानन्द महास्थविर २०४७ साल भदौ ५ गते दिवंगत जुयाबिज्याःगु खः ।