पेट्रोलया कर चीकेत माग
येँ – सरकारं पेट्रोलियम पदार्थया भाः थकाःगु विरोधय् थौं राष्ट्रिय उपभोक्ता मञ्चं सरकारयात सुझाव पत्र बीगु जूगु दु । मञ्चया अध्यक्ष प्रेमलाल महर्जनं सरकारं पेट्रोलियम पदार्थया भाः थकयाः उपभोक्ता जँ त्वःथुलेत स्वयाच्वंगु धासें सरकारं कयाच्वंगु अनावश्यक कर जक म्हो यायेगु खःसां नं पेट्रोलया भाः क्वकाये फइगु खँ नं कनादिल ।
सरकारयात थःपिंसं बीत्यनागु सुझाव जक कार्यान्वयन यायेगु खःसां नं पेट्रोलियम पदार्थया भाः क्वकाये फइगु दावी यासें वय्कलं ‘नेपालभाषा टाइम्स’ यात कनादिल, ‘सरकारं आः नं म्वायेक म्वायेकं थीथी कर कयाच्वंगु दु अज्याःगु कर जक चीकेगु खःसां नं पेट्रोलियम पदार्थया भाः क्वकायेफइ । भारत सरकारं हे पेट्रोलियम पदार्थय् कयाच्वंगु कर छुट बियाः जनतायात राहत बियाच्वंगु दु, तर नेपाल सरकारं थुखेपाखे बिचाः मयाः ।’
सरकारं पूर्वाधार कर धकाः प्रतिलिटर पेट्रोलय् १० तका कयातःगु दुसा सतक मर्मत कर धकाः ५ तका कयातःगु दु । उकथं हे वातावरण कर धकाः ४ तका कर कयातःगु दु । सरकारं आः तत्काल मूल्यअभिवृद्धि कर मचीकूसां नं मेमेगु कर चीकेमाःगु सः थ्वयाच्वंगु दु ।
मेखे नेपाली कांग्रेसया प्रवक्ता प्रकाशशरण महतं पेट्रोलियम पदार्थय् फये हे मफयेक अन्तर्राष्ट्रिय मूल्यवृद्धि जूगुलिं नेपाः सरकारं नं भाः थकाःगु खँ धयादीगु दु । म्हिगः कांग्रेस ज्याकुथी जूगु पत्रकार सम्मेलनय् न्ववासें वय्कलं धयादिल, ‘जिमिसं थ्व विषययात हल्का रुपं कयागु मदु । आः नं सरकारं तःधंगु अनुदान बियाच्वंगु दु, तर अन्तर्राष्ट्रियस्तरय् ह्वात्त हे भाः थहां वंगुलिं सरकारं बिउगु अनुदानं नं क्षतिपूर्ति याये फयाच्वंगु मदु । सरकारं जनतायात म्हो जक समस्या जुइकथं व्यवस्थापनया कुतः यानाच्वंगु दु ।’
वय्कलं सरकारं जनतायात मूल्यवृद्धिया मार मलाकेगु अवस्था दयेकेत कुतः यानाच्वंगु धासें धयादिल, ‘थ्व सरकारं निर्णय यानाः भाः थकाःगु मखु, अन्तर्राष्ट्रियस्तरय् मूल्यवृद्धिया लिच्वः कथं थहां वंगु खः । मूल्यवृद्धिया लिच्वः गुकथं म्हो यायेगु धइगु बारे सरकार थप
गम्भीर जुइमाः ।’
उकथं हे उपभोक्ता हित संरक्षण मञ्चया उपमहासचिव कुमारी खरेलं सरकारं अनावश्यक रुपं व्यापारीयात फाइदा जुइ कथं भाः थकाःगु द्वपं बियादीगु दु । भारतय् पेट्रोलियम पदार्थया भाः थहां वनेवं नेपालय् भाः थकायेमाःगु अवस्था मदु धासें वय्कलं धयादिल, ‘आयल निगमयाके खुलायात गाक्क भण्डारण यायेगु क्षमता दु । भारतय् भाः थहां वनेवं थन थकायेमाःगु मदु ।’
वय्कलं नेपालं भारतया छगू जक कम्पनीपाखें पेट्रोलियम पदार्थ कायेगु यानाच्वंगुलिं नं भाः थहां वनाच्वंगु खः धासें थीथी देय्पाखें पेट्रोलियम पदार्थ आयात यायेमाःगु सुझाव नं बियादिल । भारत सरकारं जनतायात राहत जुइमा धकाः पेट्रोलय् १६ भारु व डिजेलय् १३ भारु क्वकाःगु दु ।
मेखे पेट्रोलियम पदार्थया भाः थकाःगु विरोधय् एमाले समर्थित विद्यार्थी संगठनं मसाल जुलुस पिकाःगु दु । म्हिगः न्हिनय् उमिसं त्रिचन्द क्याम्पसं मसाल जुलुस पिकाःगु खःसा उकी प्रहरीं हस्तक्षेप याःगु खः ।
LEAVE YOUR COMMENTS