वाइड बडी छानबिनया धेंधेंबल्लाः

येँ – नेपाल वायुसेवा निगमं न्याना हःगु निगः वाइड बडी विमानया खरिद प्रक्रियाय् भ्रष्टाचार जूगु दु धकाः थौंकन्हय् राज्यया प्यंगू निकायं छानबिन यानाच्वंगु दु । संसदया सार्वजनिक लेखा समिति, संसदया हे अन्तर्राष्ट्रिय सम्बन्ध समिति, अख्तियार दुरुपयोग अनुसन्धान आयोग व पर्यटन मन्त्रालय अन्तर्गत सहसचिवया नेतृत्वय् गठित छगू छानबिन समिति यानाः प्यंगू निकायपाखें थुकी छानबिन न्ह्याकाच्वंगु दु ।

छगू हे प्रकरणय् प्यंगू मछि निकायं छानबिन यानाच्वंगुलिं विज्ञतय्सं वाइड बडी विमान न्याना हःगु बारे प्यंगू निकायया दथुइ छानबिनया धेंधंबल्लाः हे जुयाच्वंगु खँ धाःगु दु ।तर प्यंगूमछि निकायं छानबिन यानाच्वंसां विमान न्यायेगु ज्याय् गन छु गडबडी जुल धइगु खँ धाःसा आः तक पत्ता लगे याये फुगु मदुनि ।

संसदया लेखा समितिं थुकिया बारे छानबिन यानाच्वंगु दयेक दयेकं हानं अन्तर्राष्ट्रिय सम्बन्ध समितिं नं छानबिन याःगुलिं लेखाया कार्यक्षेत्रय् हस्तक्षेप जुल धकाः आलोचना समेत जुयाच्वंगु दु । प्यंगूमछि समितिं छानबिन यानाच्वंसां आः तक थ्व प्रक्रियाय् गल्ती वा अनियमितता जूगु थ्वहे खः धइगु खँ धाःसा धाये फुगु मदुनि ।

लेखा समितिं थ्व सम्बन्धी फुक्क फाइल यंकाः सम्बन्धित फुक्क पदाधिकारीतय्के बयान कयां नं दोष पत्ता लगे याये मफयेवं वहे पदाधिकारीतय्के लिखित बयान कयाच्वंगु दु । प्यंगू प्यंगू निकायं छानबिन यानां नं छुं पत्ता लगे मजूगुया कारण बारे धाःसा अनया महाप्रवन्धक सुगतरत्न कंसाकारं प्रश्नवाचक लिसः बियादी, ‘अनियमित ज्या छुं जूगु हे मदुसा गय् यानाः पत्ता लगे जुइ ?’