जनार्दन शर्माया द्वपं पुष्टि मजुल

येँ (नेपालभाषा टाइम्स)- निवर्तमान अर्थमन्त्री जनार्दन शर्मां बजेट दयेकेगु ज्याय् सरोकार मदुपिं मनूत हयाः हस्तक्षेप याकल धकाः लाःगु द्वपं पुष्टि जुइ मफुत । थ्व सम्बन्धी प्रमाण मलुइवं संसदीय विशेष समितिं शर्मायात सफाइ समेत बिउगु दु ।

समितिया दुजः लक्ष्मणलाल कर्णं म्हिगः प्रतिनिधिसभाया बैठकय् थ्व सम्बन्धी छानबिन समितिया प्रतिवेदन पेश यानादीगु खः । उकी शर्मायात द्वपं लानाच्वं थें करया दर निर्धारण यायेगु ज्याय् अनधिकृत मनू दुहां वंगु खनेमदुगु खँ न्ह्यथनातःगु दु । समितिं छानविनया झ्वलय् अर्थ मन्त्रालयं वःगु लिसः, भ्वं, प्राप्त जूगु सीसीटीभीया फुटेजया अध्ययन यानागु खँ धासें धाःगु दु, ‘आः तक समितिं याःगु छानविन व मुंकूगु प्रमाणया आधारय् करया दर निर्धारणय् अनधिकृत मनू दुहां वंगु खनेमदु ।’

मेखे छानविन समितिइ दुथ्याःपिं मेपिं प्यम्ह दुजःतय्सं धाःसा समितिया रिपोर्ट सिबें फरक मत तःगु दु । नेकपा एमालेया खगराज अधिकारी, प्रदिप ज्ञवाली, विमला विक व भानुभक्त ढकालं प्रतिवेदनय् फरक मत तःगु खः ।

फरक मत तःपिं दुजःतय्सं बजेट दयेकेगु झ्वलय् मन्त्रालयय् दुहां वंम्ह अनधिकृत धाःम्ह मनू लगायत छानविनया दायराय् लाःपिं मनूतय्गु कल डिटेल व मोबाइल लोकेसन उपलब्ध मयाकूगु, बजेट दयेकेगु चान्हय्या फुक्कं दृश्य दुथ्याःगु दुरुस्त अवस्थाया सीसीटीभी फुटेज उपलब्ध मयाकूगु द्वपं बिउगु दु ।