उत्कृष्ट ज्या याःपिं प्रहरी पुरस्कृत

यँे – महानगरीय ट्राफिक प्रहरीयाकथं स्वनिगलय् लिपांगु इलय् कारवाहीइ लाइपिं स्वयां पुरस्कृत जुइपिं प्रहरीया ल्याः अप्वःगु दु । चालु आर्थिक दँय् पुरस्कृत जूपिं प्रहरी अधिकृत व जवानया ल्याः ३१२ म्ह दु । महानगरीय ट्राफिक प्रहरीयाकथं थुगु आर्थिक दँय् आतकया दुने २१२ म्ह प्रहरी अधिकृत व जवान कारवाहीइ लाःगु दु ।

लिपांगु इलय् घुस नइपिं व अनावश्यक रुपं सेवाग्राहीयात दुःख बीपिं प्रहरीयात कारवाही यायेगु क्रम अप्वयेवं प्रहरीं नं बांलाक ज्या यायेगु यानाहःगुलिं पुरस्कृत जुइपिनिगु ल्याः अप्वःगु महानगरीय ट्राफिक प्रहरीं जानकारी बिउगु दु । महानगरीय प्रहरी ज्याकू रानीपुखूया प्रवक्तालिसें प्रहरी वरिष्ठ उपरीक्षक पुजा सिंहं बांलाःगु ज्या याःपिं प्रहरीयात पुरस्कृत यानागु धयादिल ।

पुरस्कृत जूपिंमध्येय् प्रहरी वरिष्ठ उपरीक्षक छम्ह, प्रहरी उपरीक्षक निम्ह, प्रहरी नायब उपरीक्षक स्वम्ह, प्रहरी निरीक्षक झिंप्यम्ह, प्रहरी नायब निरीक्षक स्वीनिम्ह, प्रहरी सहायक निरीक्षक पीन्हय्म्ह, प्रहरी हवल्दार ख्वीछम्ह, प्रहरी जवान १४९ म्ह व प्रहरी कार्यालय सहयोगी स्वम्ह दु ।

घस लित बिउपिं, जोखिमय् लाःपिंत उद्धार याःपिं अनुसन्धान सफलतापूर्वक सम्पन्न याःपिं, फरारा अभियुक्तयात ज्वनेत सफल जूपिं, उत्कृष्ट प्रशिक्षक, उत्कृष्ट ट्राफिक व्यवस्थापन याःपिं प्रहरीयात पुरस्कृत यानागु प्रवक्त सिंहं जानकारी बियादिल । थुकथं हे कारवाहीइ २१२ म्ह प्रहरी लाःगु दुसा थ्व बाहेकं ८८ म्हयात नसिहत बिउगु दुसा निलम्बन, पदोन्नति, तलब घटुवा, वृद्धि रोक्कालिसें सेवा बर्खास्त नं याःगु दु ।