मेयर साहया तं ओलीपाखे

येँ (नेपालभाषा टाइम्स)- न्यूरोडय् येँ महानगरपालिकां तछ्याःगु लँय् डिभिजन सडक कार्यालयं पीच यायेवं येँमनपाया मेयर बालेन साहं थुकिया तं धाःसा एमाले अध्यक्ष केपी ओलीपाखे प्वंकूगु दु । मेयर साहं ओलीया नां हे तोके यानाः फुटपाथ तब्या यायेगु ज्याय् पंगः थंगु धाःगु दु । मेयर साहं सामाजिक सञ्जालय् छगू स्टाय्टस तयाः गिरिबन्धु टी इस्टेटया जग्गा सट्टापट्टया खँ सुचुकेत न्यूरोडय् महानगरं याःगु ज्याय् पंगः थं वःगु खँ धाःगु दु ।

‘१० हजार करोडया काण्ड सुचुकेत मेगु काण्ड यानाः जनतायात झुक्के यायेत स्वयेमते केपी ओलीज्यू, झापाया गिरिबन्धइ बैना कयातयेधुंकूपिं निदँ दुने गिरिबन्धुया हे जग्गा बी धकाः धयातःगु दु ।

गिरिबन्धु चियाबगानया जग्गाय् यायेत्यंगु नीतिगत घोटालाय् छिगु सहभागीताया इतिहास स्वयेबलय् अन छित मधासे हः तकं सनी थें मच्वं । १० हजार करोडया काण्ड सुचुकत व जनतायात झुक्के यायेत राज्यया सम्पूर्ण शक्ति छ्यलाः न्यूरोडय् जिमिसं दयेकेत्यंगु फुटपाथयात हाकनं तब्या यायेत्यंगु दु ।’

मेयर बालेनं गिरिबन्धु काण्ड सुचुकेत न्यूरोडया लँ दयेकाः विषयान्तर यायेत स्वयाच्वंगु द्वपं बिउगु खः । तर स्थानीयतय्सं धाःसा मेयर साहं हे थःगु गल्ती त्वःपुइत विषयान्तर यायेत स्वयाच्वंगु खँ धाःगु दु । न्यूरोडया खँय् गिरिबन्धु काण्ड व केपी ओलीयात न्ह्यःने हयाः मेयर थःगु गल्ती त्वपुइगु निंतिं ओलीया काण्ड न्ह्यःने हःगु खँ स्थानीयतय्सं धाःगु दु ।