सम्झौता मयाःपिं व न्हापांगु किस्ता मकाःपिं लाभग्राहीयात धलखं चिइकल

येँ – राष्ट्रिय पुनःनिर्माण प्राधिकरणं निजी आवास पुनःनिर्माणया निंतिं लाभग्राहीलय् लानाः नं सम्झौता मयाःपिं व सम्झौता यानाः नं न्हापांगु किस्ता मकाःपिंत लाभग्राहीया धलखं चिइकूगु दु । प्राधिकरणं निजी आवास पुनःनिर्माण लाभग्राहीइ लानाः वंगु असार १ गतेतक नं सम्झौता मयाःपिं व २०७६ असार मसान्त दुने न्हापांगु किस्ता मकाःपिंत उकथं लाभग्राहीया धलखं चिइकूगु खः ।

प्राधिकरणयाकथं लाभग्राहीइ लाःसां नं सम्झौता मयाःपिं ५७,३०९ दुसा कुल लाभग्राही ७,२६,९३३ मध्ये ७,६९,६२४ जक अनुदान सम्झौता याःगु दु । थुकथं हे अनुदान सम्झौता यानाः नं न्हापांगु किस्ता मकाःपिं लाभग्राहीया ल्याः ५,५४० दु । अनुदान सम्झौता यानाः नं न्हापांगु किस्ता मकासे च्वनाच्वंपिंत असार मसान्ततकया दुने न्हापांगु किस्ता कायेगु निंतिं ई बियातःगु खः ।

प्राधिकरणया सहप्रवक्ता मनोहर घिमिरें कनादीकथं प्राधिकरणं थ्व स्वयां न्ह्यः याःगु निर्णययात कार्यान्वयन यायेगु झ्वलय् इलय् अनुदान सम्झौता मयाःपिं व सम्झौता यानाः नं न्हापांगु किस्ता मकाःपिं लाभग्राहीयात धलखं चिइकूगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु