व्यक्तित्व विकास व उद्घोषण तालिम

यल(नेपालभाषा टाइम्स)- यल महानगरपालिका वडा नं. ८ भोलध्वाखाय् मिसातय्त लक्षित यानाः न्ह्याकूगु व्यक्तित्व विकास व उद्घोषण तालिम क्वचाःगु दु । भोलगणेश महिला समूहया ग्वसालय् झिन्हुयंकंया उगु तालिम जूगु खः ।

यल महानगरपालिका ८ वडाया ग्वाहालिइ जूगु तालिमय् स्वीम्ह मिसापिनिगु सहभागिता दुगु खः । समापन ज्याझ्वलय् मूपाहांकथं झायादीम्ह ८ वडाअध्यक्ष बाबुरत्न महर्जनं प्रशिक्षार्थीतय्त दसिपौ लःल्हानादीगु खः । ज्याझ्वलय् नवासें वय्कलं वडापाखें वइगु दिनय् संचालन यायेगु सीप विकास तालिमया प्रभावकारिता अप्वयेकेत थुकथंया मेमेगु नं तालिम संचालन याना वनेगु जुइ धयादिल ।

समूहया नायः रमिला वज्राचार्यया सभापतित्वय् जूगु समापन ज्याझ्वलय् प्रशिक्षक सुरजवीर वज्राचार्य, प्रशिक्षार्थीपिं रमिला महर्जन, सानुमैया महर्जन, विमला वज्राचार्य, इन्दु तामाङ, लिजा महर्जन, सुरक्षा वज्राचार्यपिंसं तालिमया अनुभवयात कयाः नुगःखँ तयादीगु खः ।

समूहया उपसचिव शर्मिला महर्जनं लसकुस यानादीगु ज्याझ्वलय् कोषाध्यक्ष रमा श्रेष्ठं सुभाय् देछनादीगु खःसा समूहपाखें ८ वडा व प्रशिक्षक वज्राचार्ययात मतिनाया चिं लःल्हाःगु खः ।

ज्याझ्वलय् वडाया जनप्रतिनिधि नापं वडाया थीथी संघसंस्थाया प्रतिनिधिया नं उपस्थिति दुगुु खः ।