जनबहाःद्यःया लँय् उपत्यका विकास प्राधिकरणया लट्ठा !

येँ (नेपालभाषा टाइम्स)- थनया जमलं भोताहिति वयेगु लँय् लाक्क सिमेन्टया लट्ठा थनातःगु खनाः येँया सम्पदाप्रेमि ल्याय्म्हत अजूचायेमाल । उगु लँ धइगु दँय्दसं जनबहाःद्यःया रथ सालेमाःगु लँ खः । यदि अन अज्याःगु सिमेन्टया लट्ठा थन धाःसा अनं रथ हे साले फइ मखु ।

सम्पदा अभियन्ता गणपतिलाल श्रेष्ठया पुचलं थ्व लट्ठा सुनां अन थनेत्यंगु जुइ धकाः थीथी सरकारी ज्याकुथिइ स्वापू तः वन, सुनां हे जिमिसं यानागु मखु । उगु थाय् लाःगु वडा नं. २८ यात नं थुकिया जानकारी मदुगु जुयाच्वन । जनबहाःद्यः जात्रा व्यवस्थापन समितिया नायः निलकाजी शाक्यं थ्व लावारिस लट्ठा थुना हे छ्वये माली धकाः जानकारी बीवं बल्ल उपत्यका विकास प्राधिकरणं थ्व लट्ठा थःपिंसं थनागु खः धकाः जानकारी बिउ वल ।

प्राधिकरणं थ्व लट्ठा छाय् थनेत्यंगु खः मसिउ । उमिसं अन जनबहाःद्यः साली धइगु नं मसिउ धकाः लिसः बिउगु खँ सम्पदा अभियन्ता श्रेष्ठं कनादीगु दु । म्हिगः सम्पदाप्रेमितय्सं सांकेतिक रुपं उगु ढलानया दण्डी चाना छ्वःगु दुसा बाँकी ब्व प्राधिकरण थःपिंसं हे चायेगु खँ धाःगु दु ।

लुमंकेबहः जू, उपत्यकाय् विकासया नामय् जनताया छेँ थुनेत न्ह्यचिलाच्वंगु थ्व प्राधिकरण खारेज यायेमाः धकाः उपत्यका नगरपालिका फोरमं माग याना वयाच्वंगु दु ।