बुद्ध शिक्षाया आधारभूत तालिम

ख्वप(नेपालभाषा टाइम्स)- मैत्रेय युवा संघया ग्वसालय् बुद्ध शिक्षाया आधारभूत तालिम शुरु जूगु दु । थेरवाद बुद्धिस्ट एकेदेमिया प्रिन्सिपललिसें विश्वशान्ति विहारया श्रद्धेय भिक्षु निग्रोध महास्थविरं शनिवाः जूगु छगू ज्याझ्वःया दथुइ दीप प्रज्वलन यासे तालिमया उलेज्या याना बिज्याःगु खः ।

पंचशील ग्रहण यासें न्ह्याःगु ज्याझ्वलय् तालिमया संयोजक लक्ष्मीचन्द्र वज्राचार्यं लसकुस यानादीगु खः भिक्षु निग्रोधं तालिमया विषय काःघानाः धर्मोपदेश बियाबिज्याःगु खः । थनया थीथी ब्वनेकुथिया शिक्षक, व्यवसायी व परियत्ति ब्वँमि यानाः मुक्कं नीच्याम्हेसिनं तालिमय् ब्वति कयाच्वंगु दु ।

प्रशिक्षार्थीपिनिगु म्हसीका नं बिउगु तालिम उलेज्याझ्वलय् संघया नायः तीर्थराज वज्राचार्यं सुभाय् देछानादीगु खः । प्रत्येक शनिवाःपतिकं न्हय्गू हप्तातक सुथसिया च्याताः इलय् उगु तालिम न्ह्याइगु ग्वसाः खलकं जानकारी बिउगु दु । थथुबहीया जयकीर्ति विहारय् उगु तालिम जुइगु व श्रद्धेय भिक्षु, अनागारिका गुरुमां व बौद्ध विद्वानपिंसं प्रशिक्षण बीगु ज्याझ्वः दु ।