थौं जसपा नेतातय् छ्यंग्वः ल्याः खाइगु

येँ – जनता समाजवादी पार्टीया आधिकारिता परीक्षण यायेगु लागिं थौं निर्वाचन आयोगं निगुलिं पार्टीया दुजःतय् छ्यंग्वः ल्याः खाइगु जूगु दु । आयोगं थौं छ्यंग्वः ल्याः खायेगु धकाः तयातःगु ज्याझ्वः स्थगित यायेगु लागिं अध्यक्ष महन्थ ठाकुरं सर्वोच्च अदालतय् तःगु रिटय् अन्तरिम आदेश जारी मजुइवं निर्वाचन आयोगया थौंया ज्याझ्वः निर्धारित कथं न्ह्याः वनेत्यंगु खः । सर्वोच्चया न्यायाधीश कुमार रेग्मीया एकल इजलासं थुकी अन्तरिम आदेश बीम्वाःगु आदेश बिउगु खः ।

निर्वाचन आयोगं जसपाया आधिकारिता सम्बन्धी विवादय् थौं कार्यकारिणी समिति दुजःपिंत उपस्थित जुइत सःतूगु खः । ठाकुरं निर्वाचन आयोगया थ्व प्रक्रिया दिकेत सर्वोच्चय् रिट तःगु खः गुकी ठाकुर पराजित जूगु दु । संसदीय दल व कार्यकारिणी समिति निथासं थःपिं अल्पमतय् लायेवं ठाकुर पक्षं निर्वाचन आयोगं यायेत्यंगु कुतः दिकेत सर्वोच्चय् रिट दायर याःगु खः ।

सर्वोच्चया म्हिगःया आदेश लिपा आः निर्वाचन आयोगं थःपिंसं निर्धारण यानातःगु ज्याझ्वः कथं जसपाया आधिकारिता सम्बन्धी निर्णय याये फइगु जूगु दु । थुकिया लागिं निर्वाचन आयोगं थौं निगुलिं पक्षया कार्यकारिणी दुजःतय्त थःपिनि नागरिकताया प्रतिलिपि ज्वनाः आयोग ज्याकुथी वयेत आदेश बिउगु दु । आः गुगु पक्षय् बहुमत सदस्य दु निर्वाचन आयोगं वहे पक्षयात आधिकारिक पार्टी माने यानाः फैसला याइगु खँ धाःगु दु ।