आः धरहरा दयेका च्वनेम्वाः- उपमेयर खड्गी

येँ – २०७२ सालया तःभुखाचं दुंगु धरहरा आः हानं ध्वस्वाका च्वनेम्वाःगु व उकियात स्मारक दयेकेमाःगु खँ उपमेयर हरिप्रभा खड्गी श्रेष्ठं धयादीगु दु । वय्कलं ‘नेपालभाषा टाइम्स’ लिसें खँ ल्हायेगु झ्वलय् उगु खँ धयादीगु खः ।

थः चीनया भ्रमणय् वनागु इलय् अनया छेन्दु धाःगु थासय् नं न्हापा भुखाचं दुनावंगु क्षेत्रयात आः स्माकर कथं विकास यानातःगु खँ कनादिसें धरहरायात नं उकथं हे संरक्षण यायेमाःगु खँ धयादीगु खः । वय्कलं धयादी, ‘तःभुखाचं दुनावःगु खः धइगु चिं ल्यंका तयेगु लागिं नं अन स्मारक दयेकेमाः ।’ उगु स्मारक क्षेत्रय् भुखाचं मदुपिनिगु नां च्वयेगुया लिसें क्षतिया विवरण आदि अभिलेख कथं तयेगु यात धाःसा लिपाया पुस्तां नं उकिया बारे सियाच्वनीगु बिचाः नं वय्कलं प्वंकादिल ।

धरहरा क्षेत्रय् स्मारक दयेकल धाःसा पर्यटकत वइगु खँ कनादिसें उमिगुपाखें आर्थिक फाइदा काये फइगु खँ नं वय्कलं धयादीगु दु ।

चीनय् नं भुखाचं दुनावंगु क्षेत्रयात आः तकं गथे खः अथे हे तयातःगु जक मखु कि उगु क्षेत्रय् स्वःवनेत नं ध्यबा पुलेमाःगु व्यवस्था यानातःगु खँ वय्कलं कनादिल ।