काष्ठकला प्रशिक्षार्थीतय् काष्ठकला ब्वज्या

येँ- येँ महानगरपालिका सम्पदा तथा पर्यटन विभागया ग्वसालय् वंगु पुस ८ गतेनिसें न्ह्याःगु लत्यायंकंया काष्ठकला तालिमया औपचारिक समापन ज्याझ्वः जुल । विभागं नेपाल हस्तकला महासंघया कला व शिल्प परिषद्या सहकार्यय् थनया राष्ट्रिय सभा गृहय् ४५ न्हुया रोजगारमूलक आधारभूत तालिम ज्याझ्वः याःगु खः ।

तालिम समापनया इलय् काष्ठकलाया प्रशिक्षार्थीतय्सं तयार याःगु थीथी कथंया काष्ठकलाया प्रदर्शन नं याःगु खः । उगु इलय् येँ महानगर प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ लगायत उच्च पदाधिकारीतय्सं प्रदर्शनीया अवलोकन यानादीगु खः ।

तालिम समापनय् नवासें येँ महानगर प्रमुख शाक्यं तालिमय् सहभागि प्रशिक्षार्थीतय्सं तालिम समापन याये न्ह्यः हे वर्कसप चायेकूगु धइगु खँ न्यनाः थः तसकं लय्ताःगु नापं सुखद अनुभूति यानागु खँ कनादिल ।

थःपिंसं आपालं तालिम संचालन यानागु व दसिपौ जक कयाः ज्या मयाःगु खँय् असन्तुष्टि प्वंकुसे महानगर प्रमुख शाक्यं धयादिल, ‘जिमिसं आपालं रोजगारमूलक तालिम संचालन यानाः । तालिमय् ब्वति काःपिं सकसिनं दसिपौ ला काल तर, उकथं सकसिनं ज्या धाःसा मयाः ।’

‘थःपिनिगु चाहना तालिम काःपिंसं थम्हं सयेकागु सीपया उपयोग यानाः चिधंगु जूसां उद्यम याये फयेमा धइगु खः’, प्रमुख शाक्यं धयादिल, ‘२०७२ सालया भुखाय् लिपा सम्पदा व भौतिक संरचनाय् तःधंगु क्षति यायेवं काष्ठकलाया ज्या याइपिनिगु तसकं आवश्यक जूगु खनेदत । उगु इलय् अज्याःपिं कलाकार मालेत तसकं थाकुल । उकिया अभाव आतक नं ल्यनाच्वंगु दु । स्वनिगलय् थुकिया अभाव गबलें नं पूवनी मखु उकिं छिकपिंत आवश्यक जूसां मेगु चरणय् विशेषज्ञ तालिम नं संचालन यायेगु जुइ ।’

उपप्रमुख खड्गी श्रेष्ठं काष्ठकला थें हे आः धातु, प्रस्तरलिसें मेमेगु विधाय् नं तालिम संचालन यायेमाः धासें थुकथंया तालिमय् मिसातय्त नं सहभागि जुइत उत्साहित यायेमाः धयादिल ।

सम्पदा विभाग प्रमुख अर्चना शाक्य, उपनिर्देशक श्रृजु प्रधान, तालिम संयोजक प्रदीप शाक्य, हस्तकला महासंघया कला व शिल्प परिषद्या अध्यक्ष राजमान वज्राचार्यं नुगःखँ तयादीगु खः ।

दकलय् न्हापां काष्ठकलाया निंतिं आवश्यक सिँ ल्ययेगु, तालिमया निंतिं आवश्यक ज्याभः सम्बन्धी आभारभूत जानकारी बियाः शुरु जूगु तालिमय् ल्वाभः ज्वयेकेगु, ज्वः वा मज्वः, कार्बन पेपरय् नक्सा कीगु, नक्सा कथंया बुट्टा दयेकेगु बुट्टा स्वायेगु आदि तालिम बिउगु खः ।

महानगरं बिउगु थ्व निक्वःगु संस्करणया तालिम खः । थ्व स्वयां न्ह्यः २०७२ सालया भुखाय् लिपा पुनःनिर्माणयात ध्यानय् तयाः थुकथंया तालिम बिउगु खः । ज्याझ्वलय् तालिमया प्रशिक्षार्थीतय्त महानगर प्रमुख शाक्यं दसिपौ नं लःल्हानादीगु खः ।