एमसीसी पाै सार्वजनिक प्रकरण : दाहालपाखें सत्ता त्वःतेगु ख्याच्वः
येँ – प्रधानमन्त्री शेरबहादुर देउवा व नेकपा (माओवादी केन्द्र) या अध्यक्ष पुष्पकमल दाहालं एमसीसीयात च्वःगु पौ व थुगु पौया लिसलय् एमसीसीं छ्वयाहःगु पौ सार्वजनिक जुइवं नेपाःया राजनीति आः गुकथं न्ह्याःवनी धयागु चर्चा शुरु जूगु दु । प्रधानमन्त्री देउवा व अध्यक्ष दाहालं एमसीसीयात च्वःगु पौ म्हिगः सार्वजनिक जुइवं माओवादी केन्द्रया अध्यक्ष दाहालं प्रम देउवायात फोन यानाः उकिया बारे जानकारी कयादीगु खः ।
लिसलय् प्रधानमन्त्री देउवां थम्हं उगु पौ सार्वजनिक मयानागु खँ धयादीगु खः । खँल्हाबल्हाया झ्वलय् अध्यक्ष दाहालं थम्हं सरकारय् दुपिं मन्त्रीतय्त लित सःतेत्यनागु जानकारी देउवायात याकूगु खँ सीदुगु दु । प्रम देउवा न्ह्याथे यानाः नं एमसीसी पारित याकेगु पक्षय् वनाच्वंगु विश्लेषण यासें दाहालं सरकार त्वःतेमाःगु विश्लेषण यानादीगु खँ सूत्रं धाःगु दु । तर अथे खःसां नं सत्ता गठबन्धनयात धाःसा निरन्तरता बीगु खँ अध्यक्ष दाहालं देउवायात धयादीगु दु ।
खँल्हाबल्हाया झ्वलय् अध्यक्ष दाहालं धयादीगु दु, ‘छिकपिंसं न्ह्याथे यानाः नं एमसीसी पारित यायेत स्वयाच्वन, आः अमेरिकां नं दबाब बीगु शुरु यात, थ्वहे इलय् एमसीसीयात च्वयागु पौ नं सार्वजनिक जुल, गुगु गलत खः ।’
उकथं हे अध्यक्ष दाहालं प्रम देउवायात तत्काल एमसीसी पारित मयायेत सहमति जूगु अवस्थाय् आकाझाकां पौ सार्वजनिक यायेगु गतल जूगु खँ धयादीगु खः । लिसें वय्कलं प्रधानमन्त्रीयात ख्याच्वः बिसें धयादीगु दु, ‘छिं एमसीसी पारित याकेगु खःसा याकादिसं, पारित यायेत समस्या दुसा एमालेयाके ग्वाहालि कायेगु खःसां नं कयादिसँ, तर जिपि सरकार च्वनेगु जुइ मखु, लिसें एमसीसी पारित यायेगु पक्षय् नं मदु ।’
प्रधानमन्त्री देउवा व अध्यक्ष दाहालं छ्वःगु पतिइ छु दु ?
प्रधानमन्त्री देउवा व अध्यक्ष दाहालं एमसीसी पारित यायेगु निंतिं मेगु न्याला खुलाया ई बीत इनाप यासें पौ छ्वःगु खः । पतिइ एमसीसी पारित यायेत छुं ई माःगु धासें थ्व इलय् सत्ता गठबन्धन दुने सकारात्मक सहलह यायेगु एमसीसी पारित यायेगु वातावरण दयेकेगु प्रतिबद्धता प्वंकातःगु खः ।
अमेरिकां च्वःगु पतिइ छु दु ?
प्रधानमन्त्री देउवा व अध्यक्ष दाहालया पौया लिसलय् एमसीसीं छ्वयाहःगु पतिइ वइगु फागुन १६ गते दुने संसदं अनुमोदन यायेमाःगु खँ धयातःगु दु । यदि उगु इलय् तक अनुमोदन मजुल धाःसा मार्च २२ च्वनीगु एमसीसीया बोर्ड बैठकं नेपाः लिसेया सम्झौता रद्द यायेगु निर्णय यायेफइगु खँ न्ह्यथनातःगु दु ।
एमसीसीया प्रमुख कार्यकारी अधिकृत महमुद बाहं प्रधानमन्त्री शेरबहादुर देउवा व माओवादी केन्द्रया अध्यक्ष पुष्पकमल दाहालयात मंकाः पौ च्वयाः एमसीसीं आः छीगु पलाःया बारे जानकारी याकूगु खः ।
प्रमुख कार्यकारी अधिकृत बाहं थुगु सम्झौतायात निरन्तरता बीगु बारे नेपाःया ‘सार्वभौम इच्छा’ जुइगु विश्वास नं प्वंकातःगु दु ।
एमसीसीं च्वःगु पतिइ च्वयातःगु दु, ‘डिसेम्बर १४ य् एमसीसीया निर्देशक बोर्डय् नेपाः लिसेया सम्झौताया अवस्था व छिकपिंसं सेप्टेम्बर २०२१ य् छ्वयाहःगु पौयात कयाः समीक्षा जुल, एमसीसी बोर्डं छिकपिसं याःगु प्यला न्यालाया दुने सम्झौता अनुमोदन यायेगु प्रतिबद्धता प्वंकूगु खँयात नोटय् काःगु दु ।
सम्झौताया पक्षय् जनचेतना ब्वलंकेगु व थुकीलिसे स्वाःगु भ्रम चीकेगु धयागु छिकपिनिगु योजना प्रति बोर्डं आभार प्वंकाच्वना, अथेजुयाः पतिइ न्ह्यथनातःकथं वइगु फेब्रुअरी २८÷२०२२ स्वयां लिमबाक्क सांसदपिं व गठबन्धनया सहयात्रीपिं जानाः सम्झौता अनुमोदन यायेगु ज्या यानादिसँ धयागु एमसीसीया इनाप दु ।’
पतिइ एमसीसी अनुमोदन यायेगु निंतिं नेपाःया निर्वाचन तक मपीगु संकेत नं बिसें वइगु मार्चय् जुइगु एमसीसी बोर्डया बैठकं एमसीसीया सहकार्य अन्त्य यायेफुगु खँ नं न्ह्यथनातःगु दु ।
LEAVE YOUR COMMENTS