न्हय् गुलिं प्रदेश राजधानी येँय् ?

येँ : राजधानी माग यासें देय्न्यंकं हे विवाद तच्वया वयेवं सरकारं आःयात गनं हे राजधानी तोके मयासे फुक्क हे प्रदेशया सांसदतय्त येँय् हे तयाः सपथ ग्रहण याकेगु ग्वसाः दयेकूगु दुसा सरकारया उगु ग्वसाःयात चुनावय् बहुमत काःगु वाम गठबन्धनं धाःसा विरोध याःगु दु ।
सरकारं प्रदेश प्रमुख तोके यायेगु तर प्रदेश राजधानी धाःसा तोके मयायेगु निर्णय याःगु खः । छगू जिल्लायात राजधानी तोके यायेसातकि ममेगु जिल्लायापिंसं विरोध याइगु सम्भावना प्रवल जुया वःगु दु ।
उखे वाम गठबन्धनया नेतातय्सं यदि सरकारं प्रदेशया राजधानी तोके मयायेगु खःसा प्रदेश प्रमुख नं तोके याये दइ मखु धइगु बिचाः तया हःगु दु । प्रदेशय् त्याना वःपिंत सपथ ग्रहण याके माःगु खःसा संविधानया वाधा अडकाउ फुकाउ धारा प्रयोग यानाः प्रदेशया मुख्य न्यायाधीशया ल्हातं सपथ ग्रहण याकूसां जिउ धइगु खँ नं न्ह्यःने तःगु दु ।
सरकारं प्रदेश प्रमुख व प्रदेशया राजधानी तोके यायेगु बारे पार्टीतय्गु सहमति कायेत स्वःबलय् वाम गठबन्धनं थ्व ज्या सरकारयागु खः, सरकारं स्वयाः छु यायेमाः या धकाः त्वःता बिउगु खः । तर सरकारं चलाखीपूर्वक विवादय् मदुगु प्रमुख जक तोके यानाः विवाद जुयाच्वंगु राजधानी तोके यायेगु ज्या धाःसा लिपा वइगु सरकारया छ्यनय् लाकेत्यंगुलिं वाम गठबन्धनं विरोध याना हःगु खः ।
सरकारं राजधानी तोके मयासे फुक्क प्रदेशया अस्थायी मुकाम येँय् हे तयेत स्वयेगु ज्यायात गैर संवैधानिक धासें विरोध जुयाच्वंगु दु । सरकारं माघ २४ गते राष्ट्रिय सभाया चुनाव यायेगु मिति नं तोके यायेधुंकूगु जुयाः सपथ ग्रहण अनिवार्य जूगु दु ।