मिडिया फेस्टिभलया औपचारिक समापन

यल – नेवाः पत्रकार राष्ट्रिय दबूया ग्वसालय् वंगु पुस २२ गते जूगु न्हापांगु मिडिया फेस्टिभलया औपचारिक समापन ज्याझ्वः जुल । उगु ज्याझ्वः वाङ्मय शताब्दी पुरुषलिसें न्हापांम्ह समावेशी पत्रकार सत्यमोहन जोशीया प्रमुख आतिथ्यताय् वय्कःया हे छेँय् जूगु खः । दबूया नायः श्रीकृष्ण महर्जनया सभापतित्वय् जूगु ज्याझ्वःया मूपाहां जोशीं नेवाः साहित्ययात अन्तर्राष्ट्रिय ख्यलय् थ्यंकेगु निंतिं नेवाः पत्रकार राष्ट्रिय दबुलिं ग्वाहालि यायेमाः धयादिल ।

वय्कलं ०७ सालय् प्रजातन्त्र वये धुंकाः वयां लिपा हे जक समावेशी व भाषिक समानताया अभ्यास कलाकार नांया पत्रिकाया प्रकाशनं शुरु जूगु खः धासें थःपिंसं उगु इलय् हे अभियान न्ह्याकागु खःसां थौंतकं उकिं सार्थकता काये मफुगु खँय् दुःख प्वंकादिल । लिसें थौं देय् संघीय संरचनाय् वनेधुंकूगु इलय् नं नेवाःतय्सं अझ थःगु भाषिक अधिकार स्थापित यायेत आन्दोलन यायेमालाच्वंगु विडम्बना खः धयादिल । न्हापांगु मिडिया फेस्टिभल तःजिक क्वचाःगु लसताय् जूगु समापन ज्याझ्वलय् फेस्टिभलय् थीथीकथं ग्वाहालि यानादीपिंत मतिनाया चिं नं लःल्हाःगु खः । थीथी व्यक्तित्वपिंसं मिडिया फेस्टिभलया विविध पक्षयात कयाः नुगःखँ तयादीगु खः ।