ताम्राकार व मानन्धरयात पञ्चवीर सिरपाः

येँ (नेपालभाषा टाइम्स)- थुगु दँया पञ्चवीर सिंह सिरपाः च्वमिपिं उपप्रा. उर्मिला ताम्राकार व सरोज मानन्धरयात लःल्हात । शनिवाः थनया बुद्ध विहारय् जूगु छगू ज्याझ्वलय् मूपाहां वरिष्ठ साहित्यकार हितकरवीर सिंह कंसकारपाखें वय्कःपिंत थ्व सिरपाः लःल्हायेगु ज्या जूगु खः ।

ज्याझ्वलय् न्ववासें मूपाहां कंसकारं देशय् थीथी भाषाया विकास मजू धकाः पञ्चायती व्यवस्थायात वांछ्वयाः प्रजातन्त्र हल, आः ला झन् लोकतन्त्र व गणतन्त्र हे वयेधुंकल तर नेवाः भाय्या विकास धाःसा न्हियान्हिथं क्वतुना वनाच्वन, थ्व गथे जूगु खः बिचाः यायेमाःगु अवस्था दु धयादिल ।
अथे हे विहारया प्रमुख भिक्षु कोण्डन्य महास्थविरं बुद्धं सकसितं उदार जुइगु उपाय स्यना थकूगु दु, उकिं बौद्धत संकुचित जुइ मजिउ, उदार जुयाः सकसितं कःघानाः न्ह्याः वनेगुपाखे कुतः जुइमाः धइगु खँय् बः बियाबिज्यात ।

अथे हे वसपोलं थौंकन्हय् बौद्ध च्वसु च्वइपिं च्वमित म्हो जुया वनाच्वंगु खँ न्ह्यथँसें च्वयाच्वंपिंत नं छु गुकथं कःघायेगु खः धइगु खँय् चिन्तन जुइमाःगु आवश्यकता नं कुलाबिज्यात ।

सिरपाःया दाता पञ्चवीर सिंह तुलाधरं ध्यबा जक कमे यानां मगाः, उकियात सदुपयोग नं यायेमाः धासें बुद्ध धर्मया थीथी ख्यःयात फुगु कथं आर्थिक ग्वाहालि यायेगु नं छगू कथं सम्पत्तिया सदुपयोग खः धयादिल ।

युवा बौद्ध समूहया ग्वसालय् समूहया हे नायः मदनबहादुर तुलाधरया सभापतित्वय् जूगु उगु ज्याझ्वलय् सिरपाः त्याकादीपिं च्वमिपिं लिसें निर्णायक मण्डलया दुजःपिं प्रेमहिरा तुलाधर व राजु शाक्य नापं नेपालभाषा टाइम्स न्हिपौया सम्पादक सुरेश किरणपिंसं नं नुगःखँ तयादीगु खः ।
ज्याझ्वलय् रजनी ताम्राकारं लसकुस यानादीगु खःसा डा. त्रिरत्न मानन्धरं सुभाय् देछानादीगु खः ।

‘नेपालभाषा टाइम्स’ न्हिपतिइ पिहां वइगु बौद्ध च्वसुत मध्ये उत्कृष्टपिं छम्ह मिसा व छम्ह मिजं च्वमियात दँय्दसं थ्व सिरपाः बीगु याना वयाच्वंगु दु । सिरपाः कथं म्हतिं ११,१११ तका दां व दसिपौ लःल्हाइगु व्यवस्था यानातःगु दु ।